又到大閘蟹季節！專家傳授9個識買識食大閘蟹貼士！

最近經過大閘蟹專門店，見到櫃裡一隻隻肥美的蟹整齊排列，就知道大閘蟹季節又來了！年年都食開大閘蟹的你，到底對買、煮、食三方面有幾多心得？東海酒家大閘蟹專家區偉强（强哥）就教大家9個買、煮、食大閘蟹心得，買大閘蟹前記得做功課！

1. 為何秋天才是大閘蟹季節？其他月份有沒有大閘蟹食？

▲東海大閘蟹

其他月份都有大閘蟹，但要數最肥美的大閘蟹，只有秋冬季節才有。因為大閘蟹屬於冬眠生物，在冬天來臨前，牠們要儲肥自己，所以每年秋天時節，大閘蟹已經食飽，蟹膏蟹肉都比較多，因此秋冬錯過了食大閘蟹，又要等到下年了。

2. 大閘蟹跟平時食的蟹有什麼分別？

大閘蟹又叫中華絨螯蟹，屬於毛蟹的一種，绒毛較多，於淡水生長。平時食的蟹則不屬此類。

3. 買大閘蟹有何秘訣？

買大閘蟹時，通常先選蟹的Size，然後拿上手秤重量，愈重愈好，這代表蟹膏蟹肉都較豐盛。

另外，記得留意大閘蟹的肚必須為白色，代表牠一直生長的湖水夠乾淨。強哥還教大家仲可以捏一下蟹腳，愈厚實愈靚。

4. 買大閘蟹要跟產地買？

強哥教路，只要供應地湖水潔淨，沒有落農藥，經檢驗合格，已經可以有高品質的大閘蟹。除了大家耳熟能詳的陽澄湖大閘蟹外，中國東北三省（遼寧、吉林、黑龍江）的大閘蟹同樣值得入手。

5. 公蟹V.S.母蟹，哪種才好食？

公蟹、母蟹在肉質大致上沒什麼分別，但最大分別是在於大閘蟹蟹膏，公蟹蟹膏屬於軟膏，而母蟹則屬於實膏，當中以公蟹的軟膏最為好食。而母蟹蟹膏最適合用於其他蟹饌，例如炒蟹粉，但炒蟹粉過程複雜，不適合自行製作，所以建議大家買公蟹。

▲東海鮮味蟹粉小籠包

蟹粉製作小貼士：先拆出大閘蟹蟹膏，然後蒸熟後再拆蟹肉，把兩者拌炒而煮成大閘蟹粉。每隻大閘蟹的蟹粉及蟹肉最多只可製作3 - 4隻蟹粉小籠包。

6. 買了大閘蟹，但不是即日食，要怎樣確保新鮮？

坊間教授將大閘蟹放在冰箱並用濕毛巾蓋上，這個方法是正確的。不過最重要是先讓蟹飲水，才放在冰箱內。如果單單將蟹放入冰箱，蟹會變乾，更會死亡！

如果光顧餐廳食大閘蟹，上菜時蟹鉗已經鬆脫，代表大閘蟹在蒸煮時仍然生猛掙脫，代表夠新鮮！

7. 大閘蟹哪些部位不能吃？哪些部位最好吃？

大閘蟹蟹殼、心、肺、胃不能吃，因為這些部份很寒，對人體不好。而最好食的部份一定是蟹膏（尤其公蟹！）另外蟹腳指尾對上關節有一梳札實的蟹肉，肉質不錯，也是整隻蟹必吃部位！

8. 大閘蟹最佳煮法？

最佳食法是清蒸大閘蟹，清蒸前在大閘蟹下面墊一塊紫蘇葉，可作驅寒，然後反轉閘蟹、蟹肚向上原隻清蒸，有助保持蟹膏鮮甜及肉汁嫩滑，不會在烹煮過程中流失水份。

9. 吃大閘蟹還有什麼秘訣？

正確的大閘蟹食法是先吃蟹腳、蟹爪、後吃蟹身，最後是蟹膏。因為蟹身及蟹膏有蟹殼保護，有助保溫，因此可最後才吃。不過强哥個人自有一套食蟹心得，認為蟹膏是大閘蟹最珍貴部位，盡可能在最熱時食！

吃大閘蟹時可以飲薑茶，有驅寒作用。而坊間流傳的飲蟹醋其實是錯的，一般只會用來提鮮。如果在家清蒸大閘蟹，可以用鎮江醋加薑絲，即可帶出鮮味。

**Follow us on:

• Facebook: CosmoHK
• Instagram: @cosmopolitan_hk
• YouTube: CosmopolitanHK**