杜汶澤回應貝依霖疑似藍絲：「炒咗佢，咁我同共產黨有咩分別？」

杜汶澤自從被大陸封殺之後，雖然冇乜戲拍，但近年開設網台《杜汶澤喱騷》愈做愈好，但台柱之一的貝依霖（Chantale）在近日的反中送事件表態，被網民指是「藍絲」，更有人表示要罷睇杜汶澤的網台。

杜汶澤今日於網台上載一段長達20分鐘的短片「小杜消息」，分析貝依霖近日在社交網站發表的言論。「我判斷佢未必係藍絲嚟，我懷疑佢係一個懵X，即係話，佢見到啲咩嘢覺得不滿就出聲，情況就好似劉美君咁樣，又唔X知，又無端端post個支持警察啊，『我都係唔支持暴力啫』咁啫。其實呢個社會評論係好自由，但係我覺得冇嘢係免費，唔係話你上網裝個app，跟住你玩又唔使錢，嗰個錢喺邊度嚟呢？成本就係你講咗嘅嘢會有迴響，呢啲教訓我都受過，我都有講錯嘢，我都有話錯人嘅，之後我汲取咗教訓，我都有檢討自己，因為我開始明白，原來上網講嘢係要成本，你係需要為自己講嘅言論負責。」

至於討論區有關罷睇《喱騷》，指他是「食兩家茶禮」，阿澤回應：「我都係被共產黨壓迫嘅一群，我搞到差不多成副身家冇晒，我冇戲拍，我而家仲要喺網上教人煮餸，你話我食兩家茶禮？我點X樣食兩家茶禮呀？你要脅我要炒咗佢，如果唔係就等於成間公司都係舐共？」

有網民表示杜汶澤人格有問題，不在乎Chantale的政治立場，最緊要身材好「畀班咸濕仔J」，亦提到之前拖糧事件。阿澤回應道：「我幾時有唔理呢？我咪跪X低咗囉。我好想講，係咪而家呢個社會就係你要迫佢去表態，佢唔表態就係有嫌疑，如果佢係藍絲我哋就唔用得佢呢？從頭先啲post嚟睇，我覺得佢唔係咁藍絲，淨係覺得佢係冇乜立場嗰啲，乜都X。我好想講嘅係，自從我冇戲拍之後，係幾咁辛苦先至開展咗呢間公司去發展，而我哋公司第一條片過100萬view數，係Chantale拍嘅……之後嘅第二條100萬view嘅片，都係Chantale㗎，佢係我哋嘅開國功臣嚟，如果因為你哋咁樣話我食兩家茶禮，唔炒佢我就係舐共嘅，X你老味我炒咗佢我咪不仁不義？如果我驚咗你，我炒咗佢，咁同當日我被共產黨壓迫，然之後嗰啲藝人本來同我係朋友，而家連合照都唔肯影；sponsor送開衫畀我，而家連衫都唔敢送嘅人有咩分別？」

之後杜汶澤說道：「我最欣賞星期日喺尖沙嘴遊行期間，佢哋除咗好斯文之外，仲向廣東道啲中國遊客解釋整個送中惡法。我覺得，係咪真係要去了解下件事先呢？係咪真係要了解下Chantale，到底佢係點諗？如果佢係唔知嘅，我係咪應該畀多啲資訊佢知，等佢全面啲，檢討下自己如果啲嘢跟得唔貼，係咪應該唔好咁容易作出判斷？如果佢係唔X識嘅，我哋係咪好應該將我哋知道嘅嘢話畀佢知呢？我係開放討論嘅，我好想畀大家一個同我討論嘅空間，大家可以留言，我會每一個都睇，從而去睇返究竟我哋應該點樣去處理Chantale呢件事。」

點擊看杜汶澤回應片段

對於杜汶澤的回應，網民有不同回應：「踢走佢（貝依霖），換林泳淘畀我」、「杜汶澤我支持嘅，不過貝依霖真係太離譜」、「同Chantale 拍返輯時事新聞 / 通識課程啦」、「杜生好嘢！真男人！」、「支持杜生狠狠咁調教Chantale」……

Text：機