踏入初春，節氣交替天氣轉換，一冷一熱，小朋友抵抗力較低，身體無所適從。天氣轉變小朋友容易生病，特別是感冒、咳嗽和流鼻水。近日幼稚園小學復課，衞生防護中心截至17日錄得最新流感數據，累計218人患流感而死亡。新年學校長假期復課後，單日新增6所幼稚園及5所小學爆發個案。
家長除了幫小朋友做足保暖措施外，媽媽平日不妨多啲煲以下18款湯水，有效增強抵抗力，預防感冒，更滋潤止咳，提前幫子女打好個底。
撰文&圖片：小小豬Kinsey、海馬媽媽、zareen媽媽小煮意、中醫爸B – 馬琦傑醫師 | 編輯：Chloe
1.治感冒止咳秘方 神奇蘋果洋蔥蒜頭水
蘋果洋葱蒜頭水 聽說有舒緩咳嗽和增强抵抗力的功效。洋葱水和蒜頭冰糖水我也曾經給小猪燉過，這次的蘋果洋葱蒜頭水我大概都估計得到味道如何。因為加入了蘋果，所以味道都帶有甘甜味道，比洋葱水和蒜頭水更好喝！
材料（一人份量）
蘋果
洋葱
蒜頭三瓣
洋葱和蘋果份量1:1，因為我用的是小蘋果，所以用上了一個半。
做法:
將蘋果洋葱洗淨切塊，蒜瓣拍散；
我的做法就是用一個大碟子，中間放上一個碗子，然後將材料圍著碗子放，蒸燉出來的精華便會流進碗子內。
食材放入次序:蘋果–>洋葱–>蒜頭
蒸30分鐘完成。
蒸出來差不多有一碗的份量，濃濃的甘甜蘋果+温醇的洋葱蒜頭味道，不難喝！
温馨提示:
洋葱屬高敏食材，建議一歲後才食用。
小建議:
蒸燉完剩下的食物可以打成蓉給一歲以上的寶寶伴飯，真的由頭吃到內，絕不浪費呢！
2. 止咳治感冒 紓緩鼻敏感 簡易薑蔥水
功效：蔥白有助身體發汗、提升免疫力、補中不足；生薑能散風寒、溫中止嘔、化痰、擊退初期風寒感冒等。
材料
生薑 1片
蔥 1根, 用蔥白部份
水 1碗
(瘦肉 1小塊 – 可加可不加； 因為可減少薑味)
做法
1．水煮滾後, 加入薑, 小火煮5分鐘 (可加入瘦肉)
2．再將蔥白放入水裡, 關火谷1分鐘（蔥白久煮其發汗效果會遞減）
3．掉走蔥和薑(肉) 即可以飲
建議15個月以上寶寶享用
3.提高免疫力 蘋果雪梨海底椰鵪鶉湯
功效：止咳，補氣，潤肺，提高免疫力。
材料：
蘋果 2個
雪梨 1個
海底椰 半兩
鵪鶉 4隻
瑤柱 5粒
生哂淮山 半兩
無花果 5粒
做法：
1. 鵪鶉去內臟及瘀血，出水備用；
2.瑤柱浸水；
3.蘋果雪梨去皮去芯；
4.全部材料煲30分鐘
5.再放真空煲2小時即可。
注意：
1-如有感冒病徵，不能飲用
2-不能用椰果或印度椰子。真的海底椰顏色雪白,有條深啡色的邊,細看有果肉紋及呈狗牙狀
4. 止咳潤肺 蘋果川貝南北杏豬𦟌湯
材料
南北杏 2-3錢
川貝 2錢
蘋果 2-3個
豬𦟌 $25-30
粟米 1條
小元貝 少許
淮山 少許
做法
1.豬𦟌加薑片先飛水備用
2.所有其他材料洗淨，浸約15分鐘
3.加入八碗水，煲滾後將所有材料放入煲內，大火煲滾後轉最細火煲1.5-2小時
5.提高免疫力 虎乳靈芝黨參燉豬腱
虎乳靈芝對補益肺氣，對提高免疫力都有好有幫助；黨參有補中益氣、固本健脾；百合潤肺止咳；麥冬具清熱養陰、潤肺養胃；海玉竹養陰潤肺作用。(網上資料)
虎乳靈芝 半両、黨參半両、百合半両、麥冬半両、海玉竹半両、南北杏一湯匙、蜜棗2粒、豬腱約$35~
將所有藥材浸洗一陣~豬腱切塊後汆水備用~
將所有材料放入燉盅內，然後加入1.5L滾水~
然後放入電子燉盅燉3小時~
最後加少少鹽調味~
燉湯因為有密封住燉盅，所以材料唔容易流失水份，啖湯就自然會突別清香，個湯又真係唔難，加上小朋友又鐘意，唔介意煲多啲俾佢飲，打好個底都病少啲呀！
溫馨提示：
–黨參屬性比較滋補，所以感冒者不易飲用！
-由於個別人仕體質不同，所以大家記得煲之前了解下自己，如有疑問，請先向註冊中醫查詢！
6.猴頭菇蘋果椰片南棗湯
猴頭菇益處多，有提高人體免疫力、抗氧化、提高胃部及消化系統功能等等；蘋果助消化、生津潤腸；南棗健脾補腎；花生含多種維生素、補腎益精；眉豆健脾化濕；蜜棗止咳潤肺。
材料：
猴頭菇 1個（約30g）
蘋果 2個
椰片 50g
南棗 5粒
花生 40g
眉豆 40g
蜜棗 2粒
豬展 $30
水 3L
做法：
1) 蘋果去皮去芯切件備用
2) 豬展切件出水備用
3) 猴頭菇 以清水浸片刻並擠乾水
4) 去核南棗、椰片、花生、眉豆及蜜棗清洗略浸備用
5) 將所有材料放入高壓煲煲20分鐘，於喝前再大滾一下便成 （若用一般煲具，則以大火煲滾，再用文火煲2-3小時便成）
7.開胃預防感冒 牛鞦魚淮山湯
牛鞦 魚有補脾益氣、開胃的功效，它的膠質亦能養顏。紅蘿蔔健脾胃益肝明目；粟米富含蛋白質，經常食用有助提升孩子 免疫力 ，預防感冒，也能促進腸胃蠕動；紅棗補血氣及健脾；淮山補益脾胃益肺滋腎；無花果有潤腸功效。
材料：
牛鞦魚 4-5條
紅蘿蔔 2條
粟米 1條
紅棗 6粒
無花果 3粒
蜜棗 1粒
淮山 5-8片
薑片 2片
瘦肉 $20
水 2.5L
做法：
1) 牛鞦 魚洗淨抹乾備用
2) 瘦肉出水備用
3) 紅蘿蔔去皮切件，粟米切件備用
4) 淮山、紅棗去核、無花果切半、蜜棗洗淨略浸備用
5) 下油爆香薑片，放入 牛鞦 魚煎約3分鐘，轉大火及倒入沸水
6) 滾起後轉用高壓煲，再加入餘下材料煲20分鐘，於喝前再大滾一下便成 （若用一般煲具，則以大火煲滾，再用文火煲2-3小時便成）
8.平補清潤 黨參 栗子湯
黨參味甘甜、補氣養血健脾胃；淮山也是健脾胃、有益肺滋陰的功效；栗子健脾增進食慾；紅棗補血養心安神。此湯非常適合脾胃氣虛、容易感到疲倦、胃口不好、容易患上感冒之人士飲用，味道甘甜而入口。
材料：
栗子 16粒
黨參 2條
淮山 5-6條
紅棗 8粒
豬展 $35
水 3L
做法：
1) 栗子去衣備用
2) 黨參 剪至小段令其更易出味
3) 紅棗切半去核
4) 豬展出水備用
5) 黨參 、紅棗、淮山洗淨略浸備用
6) 將所有材料放入高壓煲煲20分鐘，於喝前再大滾一下便成(若用一般煲具，則以大火煲滾，再用文火煲2-3小時便成）
9. 抗感冒 潤喉 金銀菜紅蘿蔔陳腎湯
菜乾味甘甜，有清熱潤肺、潤腸通便的功效；紅蘿蔔健脾潤膚；蜜棗及南北杏止咳化痰；陳腎清燥潤肺。
材料：
新鮮白菜 1/2斤
菜乾 1束
陳腎 2個
紅蘿蔔 1條
蜜棗 3粒
南北杏 適量
瘦肉 $25
做法：
1) 瘦肉及陳腎出水備用
2) 紅蘿蔔去皮切件
3) 白菜浸軟洗淨；菜乾浸軟洗淨去菜頭
4) 蜜棗及南北杏洗淨略浸備用
5) 將所有材料放入高壓煲煲20分鐘，於喝前再大滾一下便成 （若用一般煲具，則以大火煲滾，再用文火煲2-3小時便成）
10.增強免疫力 蟲草花螺頭瘦肉湯
螺頭滋陰潤燥補肝腎；蟲草花有潤肺補腎、護肝、增強免疫力及抗衰老等功效；黨參健脾益氣；淮山補脾胃及益肺滋腎；茨實也是健脾胃；蓮子養心益腎，而且各樣食材性質都好溫和，所以好啱一家大細飲用呀！ (網上資料)
材料：
急凍螺頭4隻、蟲草花半兩、淮山1兩、蓮子1兩、黨參半兩、茨實1兩、蜜棗4粒及瘦肉$30~
做法：
先將急凍螺頭浸軟，然後去腸切半備用~
瘦肉洗淨汆水；其他食材浸洗一陣~
煲內放約3L水，待水煲滾，然後放入所有材料~
再煲滾後用大火加蓋煲約15分鐘~
之後轉慢火加蓋煲多1.5小時~
最後加少少鹽就飲得啦~
其實我都真係幾鐘意煲蟲草花湯，因為可以增強免疫力，依家啲天氣真係極度需要，免疫力少啲人都易病啲嘛。今次左螺頭嚟煲，啖湯都特別甜，所以兩位老細都添飲再添飲，見佢地鐘意都飲，人都開心啲呀！
11. 熱利賓納的味道 紅菜頭 杞子紫蘿蔔湯
紅菜頭嘅根同埋葉都含有好豐富嘅葉酸、鐵、纖維及其他營養，療效包括抗癌、補血、消化不良、虛弱怕冷、補腦及全面提高抗病能力，協助肝臟細胞再生，促進腸胃蠕動，令骨骼強健，並可預防心血管病，有助降低膽固醇(網上資料)~
紫蘿蔔嘅紫色就係來自天然嘅「花青素」，而花青素就可以對增強免疫系統能力、促進視網膜細胞再生，有助視力、增強記憶力、抗氧化，可預防有關自由基引起的疾病，包括癌症及增加血管彈性，保護血管內壁，有助血液循環，對身體各器宫和系統皆有益處(網上資料)~
材料：
紅菜頭2個(如果大嘅1個都可以)
紫蘿蔔2條
粟米1條
杞子約1湯匙
薑2片
做法：
先將紅菜頭洗淨，然後去皮及切片。佢嘅莖葉都好有用，所以洗淨切段後加埋入去一齊煲呀~
紫蘿蔔去皮切塊；粟米去皮切塊~
杞子洗淨；薑片去皮之後拍鬆，等煲嘅時候可以出味啲~
煲內放約3L水，然後隨水加入薑片~用大火將水煲滾後，將其餘材料加入煲內(杞子除外)~
待水再滾後用大火加蓋煲約15分鐘，之後轉慢火加蓋煲多30分鐘~然後可以加入杞子~
繼續用慢火加蓋煲多15-20分鐘~
最後落少少鹽就飲得啦
今次加埋紫蘿蔔一齊煲，其實個味又同之前嗰啲分別唔大，一樣都係好清甜。小朋友仲幫紅菜頭改左個名叫做熱利賓納添…哈哈哈！
12.紓緩氣管敏感 三棗茶
原來將紅棗、南棗同埋蜜棗 三棗 一齊煲，除左對補氣血更有效用之外，因為棗類都有抗過敏作用，所以對氣管敏感而引致容易咳嗽都會有調理作用。補益得來又唔會太燥火，所以對好啱小朋友飲用。今次加埋蘋果同雪梨，除左味道更加甜之外，仲非常滋潤，可以有滋陰潤燥之作用，所以就更加啱小朋友依家嘅轉季時飲用呀！
材料：
只需要蘋果3個、雪梨4個、雪梨乾3-4片、蜜棗5粒、雞心紅棗10粒及藍棗5粒~
做法：
1. 雪梨乾、蜜棗、紅棗及藍棗浸洗一陣，紅棗去核洗淨
2. 煲內放3L水，然後加入所有材料
3.待煲滾後，用大火加蓋煲約15分鐘。
4.再轉小火加蓋煲多45分鐘，係煲緊嘅時候，可以將 三棗 壓一壓，咁就可以出味啲
最後再焗15分鐘，隔渣後就可以飲得啦~
絕對唔係講笑，依個蘋果雪梨 三棗 茶絕對係我煲過咁多涼茶最好飲嘅，真係強力推介俾大家。小朋友不知幾鐘意飲，一杯接一杯咁快快口飲，仲邊飲邊話好好味。另外，當我倒俾老公飲時，竟然話唔似係我自己煲，話仲好飲過坊街買嗰啲….哈哈哈！
13. 抗菌止咳 蘋果海底椰玉竹頭無花果瘦肉湯-
近日天氣轉涼，容易喉乾舌燥，今次推介呢個湯水-蘋果海底椰玉竹頭無花果瘦肉湯，有抗菌止咳 、清熱潤肺嘅功效，煲嚟潤一潤之餘，又可以抗菌，人冇咁容易病啦！
有效抗菌止咳
材料：蘋果、無花果、海底椰、玉竹頭、無花果、蜜棗、南北杏、瘦肉
玉竹頭：
具清熱、養陰、生津、潤燥、潤肺的作用，這些與普通的玉竹功效大致相同，不過玉竹頭還能調和人體氣血運行，亦能降血脂和血壓，而且味道較香無酸味，因此售價上要比玉竹稍貴。同時，和玉竹一樣，除了入藥，玉竹頭也是煲湯的好食材，清潤去燥，老少皆宜。
除此，玉竹頭有抗菌止咳的功能，配治療慢性支氣管炎所致的咳嗽的藥物，會有較好療效。
做法：
1》海底椰、玉竹頭、無花果、蜜棗、南北杏，洗淨浸軟備用
2》將蘋果一開四，去籽去皮
3》無花果切半
4》瘦肉切大件汆水
5》凍水下瘦肉，水滾後將其他材料放入湯鍋，再滾起後轉慢火煲約2小時
飲得喇！
14.雪耳川貝杏仁煲魚湯
作用 :滋陰潤肺 潤腸通便 止咳 大便乾結(防感冒/清感冒尾)
材料 :
雪耳 5錢
川貝 5錢
南北杏 5錢
蜜棗 2-3粒
生魚 1條
鹽 適量
做法
1. 洗淨雪耳、川貝、南北杏、蜜棗
2. 生魚清洗乾淨，去清內臟，洗淨落少許鹽醃一醃，之後慢火煎至2面金黃，加熱水10碗
3. 加入所有其他材料入煲，煲1小時，加少許鹽調味即可
15.霸王花豬𦟌湯
作用 : 除痰止咳消肺熱 (防感冒/清感冒尾)
材料 :
霸王花 1兩
豬𦟌 12兩 ($20-25)
蜜棗 4粒
南北杏 5錢
鹽 適量
做法 :
1. 霸王花浸30分鐘，洗淨摘花
2. 豬𦟌洗淨，飛水備用
3.蜜棗、南北杏洗淨
4.所有材料入煲，加水10碗，大火煲滾轉細火煲1.5個鐘，加少許鹽調味即可
16.蕃茄薯仔粟米牛肉湯
作用 : 性質平和，防感冒/感冒時可飲用，營養豐富又簡單
材料：
1. 蕃茄 2個
2. 薯仔 1個
3. 粟米 1-2支
4. 牛肉 $20-25
5. 鹽 適量
做法：
1. 所有材料洗淨，切件
2. 材料放入煲，加水10碗，大火煲滾轉細火煲45分鐘，加少許鹽調味即可
17.蘋果紫花果水 （滋潤止咳 清甜 !）
材料
蘋果 1個
龍眼乾 5粒
紫花果 3粒
水 3大湯碗
做法
1.先將蘋果去皮切片，撤走蘋果芯
2.洗淨所有其他材料
3.加水入煲，凍水加入所有材料，水滾後轉細火煲45分鐘即可
*本身材料已有甜味，沒有加任何糖*
18.雪梨乾紫花果水 （滋潤止咳 補水!）
材料
雪梨乾 5-6塊
紫花果 4粒
南北杏 1湯匙
南棗 3粒
糖 1茶匙
水 3大湯碗
做法
1.洗淨所有其他材料
2.加水入煲，水滾後加入所有材料大火煲10分鐘，之後轉細火煲30分鐘，熄火焗多15-20分鐘即可
—————————————————-
適合15個月寶寶以上
飲用與否，媽媽自行選擇，以上只是個人意見純屬參考
—————————————————-
紫無花果，比一般無花果更清甜 (天然原色、無添加、果香十足)
秋冬必備～無論焗水定煲湯都非常合適
含豐富花青素 (對眼睛好)，抗氧化 (對皮膚好) 及多種維生素 (能防治傷風、感冒，增強體質)
對體弱多病的孩子有養血安神的作用
一周最多吃三次，食得多容易上火，出現便秘等問題
