邊個話重色輕友！比另一半更重要嘅好姐妹
好多人都話「人越大朋友越少，但留低嘅都係最重要嘅嗰幾個」，就算唔再好似以前日日返學咁日日見面，但每當遇到開心嘅事，會第一時間想同佢分享、傷心都會希望有佢喺妳身邊。女仔之間嘅友情比起男仔嘅兄弟情往往更加親密，拖手行街、通宵傾電話都係平常事。今日DailyView用網路大數據一齊帶大家睇吓以下十大真正閨蜜嘅特徵，妳同妳嘅閨蜜又中咗幾多呢？
DV小教室：網路溫度計透過《KEYPO大數據關鍵引擎》大調查觀測咗近萬個網站頻道（而且不斷增加ing），包括港澳地區的新聞頻道、FB、IG同埋各大討論區、Blog……透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
10 陪妳走出分手低潮
「情人係一時，但閨蜜係一世」，雖然拍拖嘅時候可能會冷落咗好姐妹，不過當妳一個電話，佢都會聽妳呻、陪妳鬧，陪妳喊，或者情人唔會陪妳走到最後，但好姐妹都會一直陪住妳。唔知大家有無經歷過呢D時候呢，當情人離開妳嘅低潮，好姐妹話畀妳知，無論發生咩事，至少仲有佢，呢一種感情真係比起愛情更加珍貴呀。
image source:pxhere
9 首席伴娘嘅不二人選
對於一個女仔嚟講，結婚絕對係人生好重要嘅一件事，伴娘呢個身分都表示住佢同新娘嘅友誼有幾深厚。應承得做姐妹一D都唔簡單㗎，除咗婚禮前後都要做好多準備工作，仲要打點一切大小事，真係少D義氣都唔得。不過可以親眼見證住自己好朋友步入人生另一階段，為佢準備最完美嘅一個婚禮，望住佢咁幸福喊到妝都花埋，都係值得嘅。
image source:Facebook/Twins 蔡卓妍&鍾欣潼
8 每年精心幫妳慶祝生日
當大家都畢咗業，少咗見面機會，生日呢D特別日子就梗係要約出嚟食個飯，幫閨蜜慶祝啦。做得好姐妹，大家生日一定都會記得，而且要提早book定檯，訂定蛋糕，買好禮物同對方慶祝。其實最重要都唔係食咩，禮物係咩，而係大家有個機會可以見個面，傾吓計，而且對方願意將生日呢一日留畀妳，都證明咗妳喺對方心中嘅重要性。今年生日妳又準備點幫好閨蜜慶祝呢？
image source:霍汶希微博
7 對妳嘅要求有求必應
「出得嚟行，梗係要義字行頭」啦，對住好姐妹都一樣，上刀山落油鑊都在所不辭，有求必應。真正好朋友就係會陪妳做好多瘋狂嘅事，就算無曬形象都無所謂，妳開到聲，諗都唔諗就願意陪妳一齊癲。有咩事要佢幫手，都唔會托妳手踭。呢D好姐妹真係要好好珍惜呀！
image source:Facebook/櫻桃小丸子驚點語錄
6 shopping第一人選
唔少男士都覺得陪女朋友行街係酷刑，因為通常一行就係全日，而且女朋友問親意見都唔知點答，女仔又會覺得好無癮。所以話，行街對象真係要慎選，最佳人選就梗係閨蜜啦。身為最了解妳嘅人，知道妳適合咩風格、顏色，買起野上嚟特別志同道合，大家互相幫大家襯衫，成個氣氛真係差好遠！
image source:unsplash
5 鍾意著一樣嘅衫
相處得耐，大家都難免被對方影響，著衫風格都可能會越嚟越接近。近年好多好朋友都會特登襯一套「閨蜜裝」出街影吓網美相，靚都要拉埋閨蜜一齊靚㗎嘛。因為鍾意嘅風格類似，買衫都自然會差唔多，甚至直頭買埋同一款、同一件衫。雖然平時女仔最怕出街同人撞衫，不過如果係同自己閨蜜撞衫就唔同講法啦，身體力行話畀全世界知道妳哋感情有幾好。
image source:Facebook/櫻桃小丸子驚點語錄
4 手機入面一堆妳嘅自拍同醜照
證明妳同閨蜜感情好定唔好嘅其中一個線索，就係妳電話入面有幾多對方嘅醜照。通常大家擺得上網嘅相都係化個靚妝，就曬角度，影好、修好圖之後先公開。作為閨蜜，見妳素顏就好平常，而因為大家係對方面前都毫無掩飾，所以往往手上都會有對方最「不堪入目」嘅相，呢D都係相處入面好值得回味嘅時刻，雖然可能係大家嘅黑歷史，不過睇返都會記起當時開心嘅時光！
image source:unsplash
3 一齊食美食
約得閨蜜出嚟，成日流流長，行街之餘，去食好野、影相打個卡都係必做嘅事之一。正所謂獨食難肥，將美食同好朋友分享梗係會更開心。每次喺Facebook同Instagram見到近排咩餐廳最多人推薦都一定要tag閨蜜，約定下次一齊去。一邊食一邊講八卦傾下近況，雖然可能成日笑對方呢排係咪又肥咗，但美食當前，食咗先講啦。
image source:pixabay
2 無話不談
好姐妹好多時唔洗講咁多，一個眼神就知道大家心入面諗緊咩。但係萬一妳真係需要盡訴心中情嘅時候，閨蜜一定都願意聽妳講。而因為感情好好咩都可以講，無論係工作，感情定家人，閨蜜都可能做一個好好嘅聆聽者，都會毫無掩飾，畀最真心嘅意見妳。事實好多事未必啱聽，但有願意同妳講真話嘅人真係好難得，所以要明白對方都係為妳好先咁誠實對妳呀。
image source:unsplash
1 一齊去旅行
好多人都話去旅行係好考驗友情嘅事，因為由安排行程到實際朝夕相對，好容易會有意見不合嘅時候。不過其實大家都咁了解對方，其實好多習慣都一早知道，另外一D日常生活嘅細節磨合一下就無事啦。反而一齊去旅行都係一個好機會令大家感情進一步，真係可以「促膝把酒傾通宵都不夠」，同閨蜜影一堆靚相留念。排喺閨蜜必做清單第一名當之無愧呀。
image source:pixabay
分析說明：
本研究資料由《KEYPO大數據關鍵引擎》提供，分析時間範圍為2019年05月09日至2019年08月06日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『閨蜜』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。