港姐首輪面試完全睇 師姐麥明詩都讚 嫩版陳自瑤 健美版楊秀惠 露墊咖啡師

受新冠肺炎影響，無綫早前宣布今年9月香港小姐選舉停辦一年，其後又改口話「復辦」，但改以「網上真人騷」形式進行。今日舉行記招宣布詳情時又改玩法，宣布接受網上面試，本周五截止，高層余詠珊更透露決賽應該會如往年一樣照樣舉行，原來所謂新玩法只係「網上面試」，昨晚便進行第一輪「網上面試」，雖然缺有點甩轆，但總算圓滿結束，觀乎首輪面試，燕瘦環肥任君選擇，亦有唔少索女，去樣！

撰文：東方新地

2020年度港姐首輪面試

陸浩明以標榜筍工去介紹參選港姐，大讚「港姐」呢份工係絕世筍工，既可彈性上班時間、可以環遊世界、可以識好多人、年薪千萬等，無論你係多倫多定肯亞，都可以透過視像面試，只要你係17-27歲，就可以劃破地域界限，截止日期更由原本的6月21延至6月26日。昨晚首輪兩小時面試，每組三至四位候選人通過視像面見評委無綫高層余詠珊和杜之克。

好波之人

第一組囡囡，比較亮眼的賴彥妤熟口熟面，除參選過中華才藝小姐，且出演過不少大片，本身愛騷身材。

空姐孖妹

廖慧儀及周美善均為空姐，只係疫情關係暫時停工，兩人各有捧場客。

陽光氣息十足的廖慧儀，貌似楊秀惠，更應要求企後俾觀眾睇全身相。

翻版超蓮vs大鼻阿梅

第三組候選人，有被指似何家千金超蓮的梁懿婷、純純兔源菲然、濃妝出事候嘉欣及愛狗之人蔣宜穎。

梁懿婷被陸浩問到被指似何超蓮，即hi爆話超開心，且粉絲上身讚爆超蓮冇架子熱心事業乜乜乜，但似唔似就見人見智啦… 其ig超多旅遊照，sell乜？梗係靚景兼富貴生活啦！

阿梅被余詠珊考起

候嘉欣一出場就知妝容出晒事，後被余詠珊問：「邊個同你化妝？」候以尷尬笑容補救謂：「我平時唔係太化妝，可能今日唇膏深色咗又畫咗眉…」化到阿梅咁，實在出事。

妖獸都市

三人一組被無綫界定為「自信」組，顧名思義自信十足，齋睇相都已經寒一寒。

被喻為「大鼻祖藍」的許舒喬，在德洲會見評委，陪跑居多。

來自四川的謝易，長到腰的頭髮頗嚇人，雖然有高學歷但享受做臨記生活，剛在悉尼做過梁朝偉做反派滿大人的Marvel電影《上氣：十環幫的傳奇》臨記，更大爆偉大氣場大，六人團隊跟身，而且勁爆靚仔。

20歲新移民等考dse的盧海虹，一身大媽娘味，不過對答得體補足。

海外佳麗精選

三位來自海外的佳麗陳慧欣、方頌琪及劉映沂，當中以橙紅bikini照已先聲奪人，之後更以紅色低胸裙現真身，頗為養眼，而現年26歲的她原來去年已參加過港姐，惜五十強止步。

陳慧欣今年再接再勵，正在夏威夷做咖啡師的她，表現信心十足。面試期間亦不慎露胸墊。

U20組

顧名思義U20組囡囡都under 20歲，個個活力十足青春無敵，其中黎卓童亦有粉絲專頁。

直播面試時穿著緊身白背心的黎卓童，19歲目前在香港城市大學修讀工商管理學，鏡頭前看起來非常纖瘦，亦被余詠珊問到點解咁瘦，佢解釋疫情期間食得健康又行山，不過其實她擁有170cm高，且笑容甜美，要入圍唔難。

麥明詩接班人

年紀最小的參賽者為17歲的葉芷澄，清純可愛，但信心十足，她的偶像是10A港姐冠軍麥明詩，面試期間對答得體，獲不少人讚賞。

活力十足的U20組別出場，已離巢無綫的師姐麥明詩都有留言讚好！

仲有其他參選佳選，總有一位啱你心水！

呢位就係當晚勞苦功高的主持人陸浩明，期待第二輪結果。