余迪偉專欄：談情慾、講女權

在一個關於sex partner (SP)的討論群組裡，有以下的對話：

A：唉！冇啦！佢噚晚話有啲鍾意咗我，咁我𠵱家買少見少啦，要搵定多幾個放袋， 唔係有時想要起上嚟，呢個話聽朝要開早，嗰個話月經，我到時真係企喺度啦…… 

B：我都試過喎，同佢好哋哋，搞咗幾次，但係幾個禮拜之後，佢約我食飯，咁我咪勉為其難去食個飯囉，食完飯梗係直落啦。之後都冇嘢㗎，冇見咗一排，個幾月後，我約佢，佢話有套戲好想睇，我已經心知不妙。睇完套戲，諗住去開房啦，點知佢話:「我哋係咪開始咗啦……」喂！大佬呀！你識唔識遊戲規則㗎？SP呀，係應該止於sex㗎！如果想拍拖，使鬼搵你咩。 

C：我嗰個仲衰，我媾佢，然後佢話要做SP，我嗰時都未試過啲咁嘅嘢，咁好啦，你話乜就乜啦。之後每個禮拜見面，見親都淨係搞嘢，咁我又覺得幾正喎，因為又唔使同佢食飯行街拍拖，又唔使見佢啲朋友、家長，又唔使搞生日聖誕情人節買禮物嗰啲，淨係happy，真係幾爽。佢嗰時仲同我講：「嗱，我哋只係SP，如果將來萬一你鍾意咗我，要同我拍拖，你記住講啊，睇到時我係咪又鍾意你囉，如果我有啲鍾意你嘅話，咁先正式一齊囉!」

我話好呀！點知過咗幾個月， 佢再同我講：「記唔記得我哋最初開始有關係嗰時，我同你講過乜啊？我話如果你將來鍾意咗我，就一定要話畀我知，但係……我覺得…… 我𠵱家有啲鍾意咗你……」我X你吖，你玩晒啦，神又係你鬼又係你，𠵱家到我唔想拍拖啊！咁之後我就冇見過佢喇！ 

D：係你哋唔識玩啫，SP嘅嘢，梗係一手要好多個啦，因為我計過嘞，啲女唔留得耐嘅，有啲幾個月自然流失，可能去咗拍拖，可能搵咗個好玩啲嘅；有啲玩幾次又話鍾意咗你；有啲玩咗一 陣，就問你係咪淨係得佢一個……所以冇㗎，如果你同一期，起碼有大約十個喺手，咁咪由得佢哋來無影去無蹤囉。SP嘅世界，係咁玩㗎啦! 

E：喂！我又冇你哋咁煩喎，因為我係基嘅，基佬世界話到明係咁玩㗎啦，如果你話去基桑拿嗰啲，話到明一次過，無後顧之憂，contact都唔使留低，你想見番都難，如果將來喺桑拿又撞返，仲想玩嘅，咁咪嚟個翻兜囉！而至於SP，冇㗎，遊戲規則潛台詞話到明啦，大家都好識做㗎，係想拍拖嘅，都唔會同你咁玩啦。

F：我啱啱睇晒你哋啲留言，我係一個女仔，直嘅。你哋要明白，直嘅又好攣嘅又好，你哋都係仔！仔喺性方面，永遠陽具行先，用條嘢諗嘢㗎嘛；而女呢，就用感情行先，用個腦諗嘢嘅！你哋嘅瞓，係純physical；而我哋嘅瞓，係純mental。講白啲，我哋好易比荷爾蒙支配，就算幾清醒、幾清楚遊戲規則，瞓多幾次，啲荷爾蒙就自然會叫你去戀愛！

我自己係女仔，我都覺得呢單嘢好煩。而我就係知道自己煩，同自己講，立定決心，唔會畀自己為咗一棵樹而放棄整個森林。起碼暫時係咁，將來就唔知啦，可能老啲嘅時候，嗰啲荷爾蒙戰勝我嗰時先算啦！但我𠵱家不知玩得幾開心！我諗呢啲係我喺SP世界，罕有打破荷爾蒙局限嘅woman’s power！哈哈！

A：我想認識你！
B：我都係！
C：喂!我打字慢咗咋喎！我都想食你呀！打錯字，係*識你呀！
D：死啦，我打得最慢，仲有冇機會識你啊？
E：你哋慢慢識啦，我走先啦，我去約人玩啦！ 

余迪偉 

紐約科技大學傳播系碩士。生活多爪多棲、冇規冇矩，但有態度。近年遊走於《口水多過 浪花》、《又要威又要戴頭盔》及舞台演出；曾推出多本關於愛情/ 性事書籍。 

**Follow us on:

• Facebook: elleOnlineHK
• Instagram: @ellehongkong
• YouTube: ELLETVHK**