無綫劇集《 愛・回家之開心速遞 》已經播咗兩年幾，朝早又重播緊劉丹套經典劇《真情》，真係朝晚都見到佢，今次搜羅入行超過50年嘅丹爺珍貴舊相，畀大家睇下後生時嘅丹爺係點樣樣！
撰文：東方新地｜圖片：東方新地
回顧75歲劉丹後生靚仔相
｜60年 學打西洋拳
1950年五歲嘅劉丹隨家人由山東嚟到香港，到咗十五歲就愛上 打西洋拳，戴起拳套成個職業拳手咁款，但大個咗工作後就冇再練。
｜72年 首擔正仆直
67年底因多次遇險放棄做海員嘅劉丹入讀國泰電影公司訓練 班，70年轉投邵氏，72年喺電影《風雷魔鏡》首次擔正男主角，點知套戲一上畫就打足四日風，狂風暴雨行雷下令票房仆直。
｜73年 神力舉兩女
電影《風雷魔鏡》仆直後劉丹多演配角，73年登上某香港電影月刊一人舉起兩位邵氏女星，左邊嘅江玲雖然有人翹實隻腳，但丹爺依然盡顯天生神力。
｜78年 入TVB做反派
劉丹75年加入佳藝電視， 至78年1月離開時多演正派人物，同月加盟無綫後卻絕大部分都係做大奸大惡嘅反派角 色，幾乎好似石堅咁定咗型。
｜81年 教愷威打拳
81年無綫官方刊物同劉丹做家居訪 問，丹爺除了大談同愛妻李馥瑩嘅戀愛 經外，仲即場教7歲嘅劉愷威打西洋 拳。
｜82年 闔家撐餐廳
82年8月劉丹同朋友合資喺九龍塘開名為「第八 站 」嘅餐廳，開張當日丹爺 一家四口迎接來賓。
｜83年 猛男鐵騎士
83年劉丹戴頭盔揸電單車，套衫襯到絕，man爆有型媲美荷李活七十年代經典猛男查理士布朗臣，而張黑白相係佢67年行船時喺越南試玩電單車。
｜84年 溫馨家庭照
84年某電視周刊到劉丹屋企做專訪，當時丹爺喺《楚留香之蝙蝠傳奇》剃頭演無花和尚，光住頭同老婆仔女排排坐 影溫馨家庭照，另外仲有同太太嘅甜蜜床照。
3大經典角色
《上海灘》奸險馮敬堯
80年劉丹喺經典劇集《上海灘》演叱咤上海嘅亂世梟雄馮敬堯，外表和善內心卻奸險，捧呂良偉演嘅丁力，卻對周潤發演嘅前左右手許文強趕盡殺絕，而套劇令一眾演員爆紅東南亞。
《射鵰》精靈洪七公
83年劉丹喺《射鵰英雄傳》演「北丐」洪七公，慈眉善目、精靈可愛又為食，83-95年四度演洪七公，角色深入 民心，原來76年佳藝電視版《射鵰英雄傳》由佢演「西毒」歐陽鋒，但因撞期改由楊澤霖接演。
《真情》愛家叉燒炳
劉丹95至99年喺長篇處境劇《真 情 》演燒臘店老闆「叉燒炳」李標炳， 待人熱誠對家庭盡責，同李司棋演嘅梁 潤善「善姨」合演令人難忘恩愛模範夫妻，而長子劉愷威則在劇中演其孻仔。