相信有唔少打工仔都嚮往有個好似外國Google或者Facebook總部般又大又舒服嘅工作環境，仲有遊樂場、健身室、游泳室等娛樂設施喺個Office入面，根本似入去玩多過返工！呢種咁嘅工作模式當然吸引到唔少打工仔去應徵啦，不過要成功入去做都唔易㗎，分分鐘連面題問題都隨時令你口啞啞！
總部位於美國嘅蘋果公司(Apple Inc.)，現已成為全球市值最高嘅科技業者，當然成為唔少零售界、科技界、服務界等人士夢寐以求想加入嘅公司啦！
最近Business Insider整合咗人力資源網Glassdoor上嘅資料，得出50條曾經於Apple公司面試時被提問過嘅問題，當中多條問題都非常古怪難答，唔好話答啊，單睇問題都嚇死寶寶啦！不過，題題都係由曾於Apple面試過嘅過來人提供㗎！真係信不信由你啦！
小編喺50條問題當中嚴選咗以下20條比較奇怪難答且深刻嘅問題，等大家試下水溫先！假如大家被問及以下問題，唔知大家又會點答呢？
1. 你想成為邊一位英雄？點解呢？(零售部門)
2. 如果你有2隻雞蛋，要測試喺高空掉落去，而唔會爛嘅最高高度，請問可以點做呢？最理想嘅解決方法又係咩呢？(軟件工程師)
3. 請向8歲小孩解釋咩係數據機或路由器，以及有咩功能。(居家專業顧問)
4. 你聰明嗎？(建構工程師)
5. 有一罐硬幣，當中混合公平硬幣(fair coin)，以及不公平硬幣(unfair coin)。如果你取出1個硬幣並擲3次，得到結果為正面、正面和反面。呢個硬幣係公平硬幣或不公平硬幣嘅機率係幾多？(首席分析師)
6. 如果你某日爬上1座山，第二日喺同一時間出發落山，喺同一個時間你會身處同一個位置嗎？(技術負責人)
7. 舉出1個失敗嘅例子，係完全失敗，無可挽救亦無法從中學習嘅例子。(資深專案經理)
8. 你最中意嘅雪糕口味是咩呢？(行政助理)
9. 過去4年中，你最美好嘅一日以及最糟糕嘅一日分別係邊日？(工程專案經理)
10. 你係一個有創意嘅人嗎？你能夠諗到啲咩係你認為有創意嘅？(軟件工程師)
11. 你將1杯水放喺唱片機上，然後開始慢慢增加轉盤轉動嘅速度。咩事會首先發生？水杯跌落、水杯翻倒、抑或水從水杯濺出嚟？(機械工程師)
12. 你有無試過對管理者嘅決定持唔同意見，你會點處理意見分歧？舉出1個例子，說明你點樣調整分歧嘅部分、事情最終結果、嗰位管理者如今會點形容你。(軟件工程師)
13. 有一位男顧客打電話嚟，抱怨佢嘅舊電腦好似磚頭咁重，你會點做？(居家專業顧問)
14. 每日有幾多個嬰兒出生？(全球供應經理)
15. 有3個箱子，1箱只放蘋果、1箱只放橘子，仲有1箱兩種水果都有，所有箱上嘅標籤都唔正確，無辦法靠標籤辨認箱中嘅水果。閉上眼打開其中1個箱子並拎出1個水果，只能靠手中呢個水果，你點樣立刻正確標出所有箱子嘅內容物？(軟件QA工程師)
16. 舉出一個你必須做嘅事比可能完成嘅事更多嘅經歷。(商店經理)
17. 你會點樣為同事策劃一次遊北韓嘅滑翔翼之旅？(硬體測試設計負責人)
18. 「62-63=1」：改變其中1個元素(數字或運算元)，令呢條算式成立。(軟件開發測試工程師)
19. 你人生中曾做過而且感到格外驕傲嘅事情係咩呢？(軟件工程經理)
20. 舉出一個你覺得有趣嘅問題，以及你會點樣解決？(軟件工程師)
唔知大家睇完以上20問感覺如何呢？不過曾有專家分析過Apple公司向應徵者提出嘅部分問題，發現其實蘋果考大家心理或者想了解大家，多於真係考智商同知識㗎！
以第5題為例，有專家分析指其實面試官只係想測試應徵者有否認真聆聽以及幽默感，因為只要細心聽清楚問題，就會發現答案！面試官問「這個硬幣是公平硬幣或不公平硬幣的機率是多少」，罐入面唔係公平硬幣就係不公平硬幣，咁抽到公平硬幣或不公平硬幣嘅機率當然係100%啦！
另外又以第15題為例，其實當中都無任何正確答案可言，面試官只想透過應徵者答問題嘅內容，了解應徵者嘅邏輯推理能力，從中了解應徵者嘅做事方法，所以其實唔洗驚答錯，仲重要係回答合理而且表現到自己嘅分析及表達能力啊！
又或者第3題為例，當然就係想測試大家應對客人、同事嘅溝通能力啦！最重要唔係估面試官想聽嘅答案，而係嘗試去解答以及表現自己優勝一面啊！
唔知大家又會點理解以上問題呢？
圖片來源：Shutterstock
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）