Switch熱潮未停過！
相信唔少人都記得早兩年Switch啱啱出嗰時，好多人寧願食炒價都要買部嚟玩，皆因佢可以一個人玩，兩個人一齊玩甚至一家人、一班朋友一齊打，成為大家閒時消遣、Party歡眾嘅必備住品！不過過咗兩年，愈嚟愈多聲音話Switch無嘢玩。傻的嗎？今日就等DailyView帶你哋睇吓2019年度，俾網民熱議嘅Switch新出十大Games啦！
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
2019年新出，依十隻Switch Games最HIT!
10 《薩爾達傳說 織夢島》
——主角其實叫「林克」（2666筆）
薩爾達系列一向都係Nintendo嘅主打自家品牌，呢一隻《薩爾達傳說 織夢島》其實係早喺1993年已經開發嘅Game，依家喺Switch推出復刻完全重製版。呢個全新版本除咗靚咗同埋個遊戲體驗好咗，仲可以勾起舊玩家對呢隻Game嘅美好回憶，可以話係同之前神作《薩爾達傳說 曠野之息》有好唔一樣嘅遊戲體驗。BTW，薩爾達係公主個名嚟！
image source:
9 《Tools Up!》
──友情大危機（2954筆）
繼《Overcooked!》之後，又一隻破壞堅定友情嘅Game登上Switch平台喇！同《Overcooked!》一樣，呢隻Game都係以四人為單位，以團隊合作去裝修屋企，玩家化身為工人，喺限時之內完成設計圖裝修，非常講求合作性！然而呢一點正正係破壞友情嘅核心，唔少朋友玩裝修玩到堅拆屋，繼而真人嗌交，友誼嘅小船話翻就翻！
image source:
8 《Winning Post 9》
──星期一至日都跑馬（3071筆）
香港人鍾意賽馬，睇平時馬場有幾墟冚就知。而依家除咗實際親身去到賽馬現場，Switch上面都可以賽馬！《Winning Post 9》喺香港可以話係相當Hit，喺Switch一推出就廣受討論。呢隻Game有個特點同平時賽馬唔同，就係玩家可以養馬去參賽，由馬嘅歲數去到血緣，樣樣都要計足，真係好似實際養馬去參賽咁，擬真度極高，喺香港廣受歡迎！
image source:
7 《瑪利歐＆索尼克 AT 2020東京奧運》
──東京，熱門運動（4355筆）
大家都知Nintendo嘅運動競技遊戲好出名，今次2019 Switch平台推出《瑪利歐＆索尼克 AT 2020東京奧運》，係奧運官方遊戲最新作品，今次Nintendo同XEGA嘅角色共同推出同台比賽，大家可以睇住音速鼠同Mario鬥快跑步或者田徑比賽，一家大細喺Party到一齊玩呢隻Game，卡通人物化身奧運選手，可以話係炒熱氣氛嘅一大佳品！
image source:
6 《路易吉洋樓3》
──Q版捉鬼唔使驚（4766筆）
《路易士洋樓》一路喺Nintendo平台都好受歡迎，隔咗幾年登上Switch平台，遊戲依然用返路易士呢個角色喺鬼屋解謎，呢個時候你就會發現，鬼唔單止唔得人驚，仲可以好Cute！呢次除咗自己玩，仲支援8個人去玩「恐怖高塔」同「遊樂園」。呢隻Game由獨樂樂走到去眾樂樂，完全符合Switch可以自己玩，又可以多人遊玩嘅特點啊！
image source:
5 《哆啦A夢 牧場物語》
──叮噹可否不要老，伴我種草（8091筆）
相信多啦A夢代表咗唔少大小朋友嘅童年，而今次多啦A夢同牧場物語合作喺Switch出咗一隻Game《哆啦A夢 牧場物語》，遊戲以大雄為主要角色，玩嘅係牧場物語嘅遊戲內容。大雄一年四季種吓菜、養吓雞、食吓嘢咁，種種遊戲特點可以話係兩大回憶殺嘅終極結合體，深得人喜愛。呢隻Game絕對係閒時自己一個打發時間嘅絕佳良品啊！
image source:
4 《聖火降魔錄 風花雪月》
──溝女定打機啊？（8760筆）
《聖火降魔錄 風花雪月》係Nintendo同光榮特庫摩合作開發嘅一隻Game，玩嘅係一款冷門但又好Hit嘅戰棋類遊戲。聖火降魔錄系列其實係一款已經有30年歷史嘅品牌遊戲，雖然無寵物小精靈、Mario、薩爾達咁Hit，但都係有一班忠實Fans支持，依家仲吸引咗唔少新Fans嚟玩添！除咗戰棋、戰鬥模式之外，仲有戀愛養成，非常啱一啲熱血青年（宅男）玩！
image source:
3 《牧場物語 重聚礦石鎮》
──回憶滿滿（12277筆）
《牧場物語 重聚礦石鎮》嘅重製招來好多80後、90後玩家嘅瘋狂討論，皆因呢隻Game代表住佢哋如何喺無智能電話速食遊戲嘅時代，度過一個又一個漫長嘅假期。好多玩家都曾經沈迷喺追女仔、結婚、種菜、挖礦等嘅劇情入面，亦都第一次知道點樣可以勞役小矮人，今次重製依然沿用可愛日本畫風，令到一眾舊玩家瘋狂，亦都吸引一班00後加入呢個牧場世界！
image source:
2 《健身環大冒險》
──減肥恩物（15063筆）
《健身環大冒險》呢個Game真係打破咗遊戲同運動嘅隔膜，網上流傳有人真係因為連續玩咗呢隻Game一個月之後火速瘦身！當然除咗瘦身減肥嘅功用，呢隻Game都有佢獨特之處。遊戲以冒險形式為玩家設計咗一系列嘅健身動作，令到玩家喺打大佬嘅同時都不知不覺做咗好多運動，可以話寓瘦身於娛樂！
image source:
1 《Pokémon 劍／盾》
──既然你誠心誠意咁問（84220筆）
Pokémon一直都係Nintendo嘅超級品牌，每逢佢出新一系列嘅Pokémon遊戲，或者係推出重製復刻版嘅時候都會掀起一陣風潮，基本上世界上好多男仔都立志成為寵物小精靈訓練員，誓要捕捉晒所有寵物小精靈同埋神獸。而今次劍盾又擴充咗圖鑑（都刪咗唔少），自然有一堆寵物小精靈訓練員即刻摩拳擦掌要去收集啦！
image source:
【以上圖文為香港網路溫度計調查結果，未經授權請勿轉載、改寫】
分析說明：
本研究資料由《KEYPO大數據關鍵引擎》提供，分析時間範圍為2019年01月01日至2019年12月31日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『2019年Switch Game』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。