沉迷動漫電玩嘅獨L如我，曾因為想扮高達駕駛員 – 希羅 (非獨 L 嘅你可自行 google 佢係乜水)，貪平走去迪卡儂買件棉質背心殺上針山，點知上到頂，件衫濕晒得嚟唔透氣，差點焗到中暑…..直至「Fate」呢個品牌嘅出現，令嗰份幻想自己係希羅嘅童真再次浮現。
相信大部分人對「Fate」嘅認識都係嚟自其同名運動服品牌，價亷物美且造貨量要求少，成近年跑會校服訂製之熱門選擇。
跟大雄有幾分相似嘅品牌主理人 – 傑哥，中學生模樣，原來已係體育系大學畢業生。年青可以任性同樣可以率性，有感一二線運動品牌價錢非一般學生所能承擔，傑哥啪啪心口，毅然成立旨在提供價亷物美之運動服品牌。小本經營，注定難捱，大抵因為傑哥跟眾多跑手一樣，有著一股死不放手嘅執着，「Fate」近年終獲不少跑友垂青，追隨者更自發成立跑團一同練習互相鼓勵，「Fate 跑會」嘅出現絕對意料之內。
意料之外嘅係，只要購買「Fate」嘅產品就可免費加入，每週跟大伙兒練習。介紹返，「Fate 跑會」絕非純開心至上嘅 social run 跑團，而係有 pacer 有 program 有 target 嘅認真跑班，傑哥繼續堅持率性到底。
廣結大小跑會，察覺好嘅跑會總能匯聚一班不為利益不計較嘅跑友。物以類聚，「Fate 跑會」有唔計較嘅教練、Pacer、攝影師、跟拍專員，甚至按摩技師……對，你無睇錯，係按摩技師。每次操練過後，Fate 眾弟兄姊妹就會躺於地上，互相拉筋推拿按摩，此起彼落嘅笑聲粗口慘叫聲，逢周三晚充斥於葵涌運動場嘅某角落，但更多嘅係青春嘅汗水與跑步嘅熱誠。
置身於呢個如此大愛，毫無金錢交易毫無利益關係嘅團隊中，讓人稍微有一份超現實嘅純真，整個晚上，眾人皆盡情地跑、開懷地笑、忘我地叫，仲有我最欣賞嘅放肆地互串。
返回現實，假使成立跑會只因品牌推廣，但若然當中嘅人、事與物無愛無火無溫度，再硬推亦只係一批缺乏靈魂嘅死物它，況且近年跑步市場上也太多卧虎藏龍吧 !
問到傑哥咁樣搞跑班點為生，佢淡淡然地答 :「無諗呀，唯有希望你哋買多一兩件衫褲啦」。呢種威化般乾脆嘅青春格外讓人神往。
The post 尋找跑會的故事 #30 | 熱誠愛心兄弟會 Fate 跑會 appeared first on Fitz 運動平台.