跑步對於一般人嚟講，可以係突破自己、強身健體或結識志同道合嘅朋友。不過對於佢哋嚟講，相信會係一個難得嘅社交機會，廣結好友外，甚至可能尋回一個新嘅自己。
「香港傷健共融網絡」嘅「猛龍長跑隊」，一個推動傷健共融嘅跑會，藉著鼓勵視障聽障人仕一齊跑步而再次感受生命嘅熾熱，隊中嘅領跑員正正擔當著橋樑嘅角色，讓他們再次跟世界連繫上，置身其中，即使短短一個晚上已能強烈感受到嗰份溫暖和大愛。
是夜首次充當領跑員，當初一直本著膽戰心驚嘅心情，怕做得唔好怕出錯怕影響跑手，結果反被佢哋一直鼓勵，感覺自己先係需要被領跑被照顧嗰位。原來做「領跑員」一啲都唔簡單，比起做「試跑員」更具挑戰性。只要試過矇眼跑步，就會明白當中那份不安感。當方向感盡失，每踏出一步都怕隨時跌低而要小心翼翼，莫說跑步，就連行路都似要重頭學起，所以作為領航角色嘅領跑員絕對唔易做，無比耐性同無限愛心只屬基本要求，還需懂得如何配合視障聽障跑手們嘅節奏，且需具備極強觀察力同應變能力。
與其說「猛龍長跑隊」係一個跑會，其實更似一個大家庭，領跑員跟跑手之間嘅關係密切如家人般，每周一次嘅跑步聚會以外，只要一個電話，就連日常起居生活甚或各類型嘅困難也會照顧到，明顯係領跑員、朋友、家人、社工嘅混合體。
畢業後投身職場之今，已很久沒感受過呢種親人以外嘅熾熱人際關係，各人嚟到會閒話家常，互問近況，訴說生活點滴，你串吓我我窒吓你，那份溫馨融洽跟其它跑會又有點不一樣，自覺是外人的我置身其中也能感到那份親切，心頭暖暖的一個晚上。
還以為主打輕鬆跑，以社交為本嘅「猛龍長跑隊」，卻找來跑界大家姐梁影雪(雪姐)任教，而且所設計嘅訓練根本與健全跑手無異，以為雪姐係紓尊降貴 ? 全屬我嘅無知，感動位係雪姐娓娓道出「猛龍長跑隊」反讓她學到更多領略更多，甚至重拾跑步中嘅真締。更叫人汗顏嘅係全港首位sub 3 視障跑手正是「猛龍長跑隊」隊員 – 振輝師兄。20多歲後天失明，谷底過厭世過，但跑步讓他再新站起來。透過正確指導與訓練及唔放棄嘅心，堅持跑步12年，最後成功sub 3，自恃正常嘅我苦練多時還未做到，怎不慚愧 ?!
人生路上，失意、困難、挫敗或碰壁老是常出現，一次又一次嘅放棄與沮喪經常把我哋原有嘅梭角磨平，繼而把我哋擊倒。我哋逐漸失去往前衝嘅那股拼勁，每個人只想盡快找到合適自己嘅安全區，自以為安穩舒適地躺平每一日。然而，喺「猛龍長跑隊」會感受到每一位視障聽障跑手或領跑員均盛著滿滿一盆生命之火嚟到呢度，咩係舒適圈咩係冒險區？呢個跑會讓我有點模糊，我甚至開始懷疑所謂舒適圈或冒險區從不曾存在過，只係我哋一直活於井底中卻從不探頭看過外面一眼罷了。
The post 尋找跑會的故事 #23 | 猛龍長跑會 appeared first on Fitz 運動平台.