【方以文問兩句】《開心速遞》「朱凌凌」吳偉豪訪問（上）

《愛回家之開心速遞》，大家又有沒有看？方以文就搵到飾演朱凌凌而上位的吳偉豪問兩句。凌凌凌凌我有嘢問，問下佢係乜嘢人！

《開心速遞》第570、571兩集嘅《父親‧明白了》可以話係朱展（陳嘉輝 飾）、朱天梯（梁証嘉 飾）同埋朱凌凌（吳偉豪 飾）三父子暫時最多感情戲嘅單元。尤其係朱氏三父子喺澳門餐廳，朱凌凌話畀朱展聽爺爺從來都冇睇過佢寄返屋企嘅信。嗰一幕，陳嘉輝、梁証嘉、吳偉豪都表現到好激動但係按捺住，眼都紅埋。不過佢哋三父子同場嘅戲從來都唔多，只係作為大學線、SO破壞線嘅輔助。凌凌凌凌我有嘢問，到底嗰場戲難唔難演呢？

 「嘩，呢一場餐廳戲，我自己都覺得係非常之經典。我都好開心呢場戲拍出嚟嘅效果係都算幾好睇，我自己都好滿意。嘉輝哥同埋証嘉哥真係好犀利，佢哋畀到好多嘢我，又令到我感受到劇本應該可以帶到出嚟嗰種感覺，所以我真係要好多謝佢哋兩個，同埋多謝導演畀咗好多指示我。」

好多時我都會諗，演員會唔會好似學生讀書咁，拎到份劇本就狂做功課狂睇熟佢，但原來係各師各法，吳偉豪話佢唔敢做過多功課。「我自己覺得現場嘅氣氛，同埋對白嘅氣氛，係要你現場即時去拿捏。我唔可以一早做好晒功課，喺劇本寫好晒呢句要點做、嗰個反應要點，因為會滑晒瓦。同埋如果一早練好排好晒，到拍嗰時，對手畀你嘅嘢係好唔同嘅話，咁就真係瀨嘢。拍呢場父子戲，我都唔係話溫咗太多。我係有時有啲即興對白或者反應先會做得好睇。因為我覺得最真實嘅嘢係最感染到觀眾嘅。如果我一早做好晒功課，現場反而唔可以發揮到即興效果。」

三父子同場唔多，但次次遇到已經要嚟料嗌交咁濟，點搞呢？「朱家嗰條線唔係話好多集數，所以我自己對嘉輝哥同埋証嘉嘅認識都唔係話太深。但係演繹上呢，我覺得大家都唔會難到大家。証嘉係一個好有經驗嘅演員，嘉輝哥就唔使講啦，更加多經驗。我同佢哋做戲嘅時候係完全唔使擔心。我拍嗰陣時淨係同自己講，要做好本份。去到現場拍嘅時候，我好信任我嘅對手，佢係畀到嘢我我又畀到嘢佢。咁大家一齊去互動，件事先會做得咁順。」咁又點同証嘉佢做到兄弟感覺呢？原來吳偉豪有兩個阿哥一個細佬，佢會拎返自己嘅經歷擺落劇本，甚至放喺對白度。

咁對於朱展嘅父子情又如何？吳偉豪話其實唔明點解朱展唔畀凌凌去讀攝影。「我就覺得自己好好彩嘅，因為始終我阿爸阿媽都好support我，支持我去做我自己想做嘅嘢，which is做一個演員。所以我自己點睇朱展呢？我係唔明點解佢唔畀個仔去做佢自己想做嘅嘢。因為我覺得始終個人開心係最重要，more important than anything else。」

由呢個角度出發去思考朱凌凌呢個角色，吳偉豪覺得佢應該係反叛嘅。「我同導演都傾咗好耐，一開頭我覺得凌凌應該係好反叛，完全反對朱展講嘅任何嘢。但同導演傾咗一段時間之後，我哋都覺得朱凌凌佢係好似佢daddy，有某啲地方係會令到佢好心軟嘅，因為朱展佢本身都係會心軟。He is not really that，佢係on the outside is hard but the inside is soft。朱凌凌佢係一個有學識嘅人，應該係明白呢個道理。」

父子情鋪排咗咁多集，終於都有呢兩集嚟個小爆發。愛情方面，朱凌凌經歷咗Bonnie同埋Miss Tong兩段無結果嘅戀愛。凌凌凌凌我又有嘢問，問吓你嘅桃花運。「我自己都唔係太知，真係睇吓編劇們點寫或者監製點舖排。我都希望有感情線，咁當然就唔急得啦，慢慢嚟，睇吓佢哋嘅安排。」金城安成日霸住朱凌凌，會唔會阻住呀？「安仔同埋朱凌凌呢一對拍檔呢，觀眾又真係非常之受落嘅，哈哈。睇吓編劇們會想跟住落嚟點樣去玩呢兩個角色，甚至係鋪排佢哋嘅故事啦。」

朱凌凌喺劇裡面係天字第一號好仔，吳偉豪嘅形象亦都非常之正面陽光。不過原來喺2015年無綫第28期藝訓班畢業嘅佢，2016年就遇到令到佢不知所措嘅低沉期。下集再問多佢兩句，敬請留意。

撰文：方以文（ig: fongemantvman）