【病情轉差】又暈又嘔痛到冇胃口 林子博指太太僅接受舒緩治療

林子博太太董燕君（Shirley）去年確診患上極罕有癌症「平滑肌肉瘤（腹腔）」，經半年治療，腫瘤縮少咗，病情向好，全家都陪伴Shirley積極面對抗癌之路。但近日Shirley病情突然告急，腫瘤劇痛，又暈又嘔且去不到廁所，甚至連下床也有困難，因而必須送院，現正在瑪麗醫院腫瘤科病房治理。
今日子博帶同仔女到荃灣出席朋友食店開張，他坦言太太只能接受舒緩治療，邊度唔妥醫邊度，喺西醫角度，佢個病冇做任何治療可以做到：「之前都試過食咗兩星期標靶藥，但副作用太大，而且對平滑肌肉瘤成效唔太大而放棄。」目前太太又暈又嘔，腫瘤痛到冇晒胃口，子博擔心道：「暫時冇人話到畀我聽點解太太暈得咁犀利，不過我哋有少少懷疑係食啲嗎啡水副作用，因為每人對藥物有唔同嘅反應，暈同嘔應該同腫瘤冇關。目前醫生轉咗另一隻冇嗎啡成份嘅止痛睇吓情況有冇好轉。」
由於疫情下未能探望太太，又沒有機會同醫生聯絡，坦言梗係擔心：「尤其小朋友會問媽咪幾時返得屋企？惟有慢慢跟子女解釋，話待媽咪好轉，喺安全情況下就會回家。」