陳曼娜割席唔知女婿被貼大字報 爆成年冇畀家用兼態度唔友善

人稱最潮外婆的陳曼娜，16年將女鄭祖兒嫁給投資公司總裁蔡朝旭，喺君悅酒店大排筵席，當時激讚女婿101分。近日蔡朝旭遭人貼「欠債還錢」大字報，記者向曼娜姐求證，她即落閘指唔清楚對方的事，又爆女婿對她態度唔友善，大家甚少來往﹗
文：東方新地

陳曼娜女婿蔡朝旭近日遭人在北角寶馬山道的欄杆貼滿大字報，橫額寫上「欠債還錢」及公開電話、身份證資料，並貼有陳曼娜與女兒鄭祖兒的合照。傳媒向陳曼媽求證，她即劃清界線指唔清楚女婿的事，更加唔知對方遭人貼大字報，大爆二人關係差，盡其量是過時過節才見面，大家生活圈子不同，就算坐埋一齊都唔會交談。對女婿割席，但對女兒就不同態度，仲話若然女兒或自己受到騷擾定必報警處理。而蔡朝旭就否認自己欠債，仲話會搵律師處理咁話﹗

開心榮升岳母的陳曼娜，跟一對新人接受訪問時激讚女婿有101分。

直認關係破裂 陳曼娜：唔見免衝突

據知陳曼娜跟女婿關係近年惡劣，跟女婿婚後不足一星期便爆出桃色新聞有莫大關係，蔡朝旭被影到結婚後兩日跟內地前度女大學生金若希見面，態度親暱，同時又流出二人的床照，金若希又自爆「五十日大姨媽沒來」暗指自己大肚，女婿與第二個女人關係複雜，但當時陳曼娜為了女兒都出面撐女婿，據知自此事之後，陳曼娜表面投以信任票，但對女婿完全改觀。而陳曼娜接受記者訪問時，亦直認跟女婿關係唔好，仲爆女婿已經一年冇畀家用，而且對她態度唔友善，陳曼娜坦言拒絕跟他有任何交流，一年一度的生日派對，女婿都冇影，而陳曼娜亦直言唔見仲好免有衝突，仲話依家享受人生、開心湊孫，其他事都唔會理。