【熊大理財教室】去旅行買到盡　教你精明兌換韓圜

韓國中秋假期將至，好多韓國人都會趁假期返鄉下探親，兔兔、熊大都唔例外，幾乎每年都會返鄉下（韓國）探吓班LINE FRIENDS。兔兔記得上年返韓國過中秋節係每1港元兌約142韓圜，而家每1港元則兌約152韓圜，變相每兌10,000港元就多賺100,000韓圜（即係兔兔可以買多幾支化妝品或者食多幾餐燒肉啦）。

兔兔天生就有Shopping嘅基因，冇得Shopping嘅話，兔兔就唔再係兔兔。 眼見韓圜近年不斷貶值，兔兔就想換定韓圜，趁假期返鄉下時可以瘋狂Shopping。

兔兔好奇韓圜一年間點解會貶值咁多。熊大就話：「中美貿易戰持續，中國經濟受到打擊，對鄰近地區如台灣、韓國等都有負面影響。韓圜可以說是今年亞洲市場走勢最弱的貨幣，8月初曾低見每1美元兌1,226.44韓圜（即是每1港元=156.1韓圜），係近3年半以來新低位。」

兔兔：「點解韓圜貶值速度會比其他亞洲貨幣快？」

熊大：「韓國係以晶片和半導體為主的出口國，今次中美貿易戰美國打擊華為，牽連到韓國。加上日韓之間的貿易關係近日出現緊張，日本將出口韓國的半導體及顯示屏相關原材料從『白名單』中剔除，取消對韓國的優惠待遇。受多個不利因素影響，韓國電子產品銷情明顯轉差。韓國最新公布的經濟數據亦強差人意，所以要透過貨幣貶值刺激出口，拖累韓圜走弱。」

兔兔：「如果年底前想去韓國旅遊，而家係咪兌換韓圜的好時機？」

熊大：「雖然中美貿易年內傾掂數機會唔大，但韓圜近一年跌勢過急，跌至現水平（每1港元=152韓圜）有喘定跡象。年底前想去韓國旅遊的人，可以考慮先兌換部分韓圜。」

兔兔：究竟市場上哪種方法兌換韓圜的最抵？

熊大：「聽得最多人講係去首爾明洞『大使館前找換店』。不過其實明洞有很多間找換台的匯率都跟大使館前差唔多。如果唔想搵路，到明洞任何一間找換店兌換都應該比香港划算。」

兔兔：「不過唔係個個旅客都好似我哋喺明洞有自己屋企（講緊LINE FRIENDS Store）。如果住的地方唔近明洞，特登去又好似會浪費時間。」

熊大：「如果唔想去明洞咁遠，其實可直接在韓國『Global ATM』櫃員機提款。先在香港開通銀行卡的海外提款功能，銀行會象徵式收取數十元的一次性手續費。海外提款係提得愈多愈划算，提得少錢的人就不太適合。」

兔兔：「旅遊出發前有外幣傍身好像比較安全。如果我想在香港兌換，你有什麼提議？」

熊大：「香港最抵匯率的找換店一定是『百年找換』，不過呢間店長期排長龍。建議可先打電話去預約，但注意預約金額須為5,000港元以上。」

兔兔：「好多人唔想排隊又唔想有兌換金額限制。同埋臨出門先發覺未換錢，那熊大你又有什麼提議？」

熊大：「如果想方便，又唔介意蝕少少手續費，建議可在本地櫃員機直接提取外幣。現時匯豐銀行（HSBC）、恒生銀行（Heng Seng Bank）已推出外幣提款機，只要有該銀行的港幣戶口，即可直接以當時匯率提取外幣。匯率不一定最好，但勝在24小時均可提款，且過程簡單，推出後都有唔少人使用。」

原來兌換外幣有咁多種方法！結果，第二日兔兔又拎咗熊大張提款卡提取現金去兌換外幣，幫佢自己個首爾基金增值。