大家睇完CHOCO介紹完DON DON DONKI銅鑼灣店嘅基本資料同美妝方面嘅特色之後，係咪意猶未盡呢？話說美妝其實只佔整間舖的其中一層，其餘3層則主打各式食品和生活百貨，教人花多眼亂，等貼心嘅CONY為大家細心整理新店重點，以及精選優惠及必買產品啦。
新引入「近江牛」 必行$9特賣蔬菜區
CONY行街鍾意由最頂層開始行，所以介紹亦由3樓開始講起啦！3樓主要係蔬果肉類、刺身及糧油雜貨專區。除了有一貫嘅日本時令蔬果及各款新鮮肉類，新店更引入有日本三大和牛之一美譽嘅「近江牛」，有齊用來食shabu shabu的肉片、用來燒的肉件和牛扒等，仲有超肥美拖羅刺身，可選原件自己返去慢慢切，亦有切好拖羅片供選擇。另外慳家寶寶必行$9特價蔬菜區，當日所見有日本大蔥、豆苗、青瓜及番茄等。
酒品齊全 日本直送原板海膽
行落2樓，係熟食、海產壽司、酒類及急凍食品專區，當中酒類嘅貨品比起其他分店更加齊全，有威士忌、紅白酒、果酒、啤酒，以及近期當造嘅梅酒和其他特色酒品。呢層仲有多款日本手信，想送禮嘅朋友可以主攻2樓。至於熟食方面就同另外兩間分店大同小異，而壽司方面，大拖羅壽司及原板海膽有做開幕優惠，有興趣嘅朋友切勿錯過。
必掃$5平貨 首推聯乘特色薯片
最後去到1樓係零食、冰品專區以及收銀處，而呢層嘅焦點落在精選特賣區，由$5至$25不等，當中包括美妝護膚品及人氣零食，而新店亦有售開幕限定嘅「明治donki福袋」，內含多款精選明治品牌嘅零食，新店更首次推出日清和DONKI聯乘嘅「博多明太味薯片」及「炸豬扒汁味薯片」。
除咗各款精選貨品及開幕優惠，新店更安排了吞拿魚解體表演，於7月11日下午6時舉行，有興趣嘅朋友可以留意。而今次新開嘅銅鑼店雖然尺數與荃灣店差唔多大，但因為分開幾層，產品分類比較清晰，不過每層空間自然會窄少少，相信剛開幕時會人頭湧湧，怕逼嘅朋友或者等熱潮稍為緩和再朝聖吧！
DON DON DONKI名珠城店
地址：銅鑼灣百德新街22-36號名珠城1-4樓
開幕日期：7月7日
