日圓兌港元今日低見4.99　周奕瑋日本大阪買樓：Yen真係好平

日圓持續貶值，再創34年地位，今日（4月26日）每百日圓兌港元跌穿「5算」，低見4.99算。精通日語、曾主持多個有關日本節目的40歲周奕瑋（Jarvis），今日在社交平台宣佈「喺大阪做業主喇」，他表示「今時啲Yen真係好平，而家買真係抵好多。」

周奕瑋向傳媒透露，入手單位約300呎，樓價約港幣七位數字頭，明年秋天收樓。他計劃之後會放租做民宿，以租金供樓，所以都是一個可以負擔到的數目。

周奕瑋在社交平台發長：「【THE。分享一個重大決定】長文嚟㗎、慎入。呢排一直係咁思考好多，終於喺啱啱，我吸咗啖氣、再的起心肝、然後簽咗個名。係簽買賣合約嘅名。各位，我做業主喇！我喺大阪做業主喇！老實講，我都俾自己呢個舉動嚇咗一跳，因為今次係我人生第一次買樓，仲要唔算諗咗好耐，就落呢個決定。不過有時就係咁，天時地利人和要來就來。再加上……今時啲Yen真係好平，而家買真係抵好多。（所以應該叫「金時地利人和」、或者「打鐵趁熱」。）」

「至於地利，本身諗過幾個區，心齋橋南船場嗰邊嘅文青區都係我心水，但始終第一次買樓Budget有限。最後我揀咗交通同生活方便嘅大阪西區一帶、大正駅附近。嚟呢度嘅第一日，就遇上個好靚嘅日落、第二次去嗰陣仲睇埋河邊嘅滿開櫻花、河邊又有好Chill 嘅餐廳、的確係自己想要嘅環境。話晒係一個ISFJ，作為I 人，唔使做嘢嗰陣，其實我真係好需要收埋自己，搵空間獨處。最後選擇呢區嗰陣，我想像到，喺呢個小社區舒舒服服散吓步，靜靜地坐喺河邊聽歌、發呆嘅自己、係啱我嘅。」

「而人和方面，多謝今次 #買大阪樓15識 呢個節目。FMI @fminvestment_hk 嘅Amous、Nicky，重啟咗我埋藏咗好耐，對買日本樓嘅諗法。以前有諗過，如果第時有錢喺日本買樓，我肯定揀咗東京先，因為話晒東京係我生活過嘅城市，係有種私心嘅。但Amous 教識我買大阪樓最大優勢係投資做民宿，呢樣嘢係我從來無諗過嘅，令我多咗個投資嘅眼光睇本身熟悉嘅日本。以前我只係會用工作／旅行嘅角度睇呢個地方，對金錢嘅諗法亦比較保守，凈係會諗住做住同一件事，努力做嘢儲錢。但今次，算係跳出呢個固有諗法，做演藝工作嘅同時，都學吓搵啲被動收入。話時話，無諗過連投資置業呢方面，自己嘅選擇都係同日本有關。」

「仲要多謝 Akina方健儀。本身真係諗住第時飛大阪，就租佢間民宿住吓㗎咋〜點知講講吓，竟然變成買間俾自己去住。呢段時間問咗Akina好多意見同經驗心得，係咁煩住你唔好意思，嚟緊可能再煩你多啲，因為我地（哋）做鄰居喇〜不過老實講，為咗做業主，今次真係將儲咗好耐嘅身家拎出嚟，但係大個仔喇，係時候俾自己試上一層樓（真係字面嘅意思）同埋都要諗吓搵啲被動收入嘅〜所以嚟緊我會提自己慳啲錢、再努力工作賺錢。出年收樓嗰陣，就可以飛去住吓自己間屋喇。Wow~~遲啲有機會再同大家分享多啲啦~」