筆者唔係一個鍾意邊聽歌邊跑步嘅人，覺得跑步都係專注嘅好，不過有時遇上啲終極長課，或者撞正得一個人跑嘅時候，有時路況許可，都會聽住歌跑，咁啲時間又確係易過啲嘅。對於運動耳機嘅要求，首要當然係輕身、唔易跑甩；亦可以留意到周圍環境聲，再者聲好樣靚，包埋就最好啦…
平時聽歌，筆者係用入耳式耳機嘅，但當然用佢嚟跑步，並唔理想。亦有想過入手骨傳導耳機，不過聽講太長時間戴用，會壓住額頭兩邊位置（即太陽穴），令致唔多舒服，亦一直未有「的」起心肝研究同揀選牌子/型號。
時間又咁啱啱好，呢排都正想下定決心，入手番個運動耳機嘅時候，就收到Oladance嘅新型號OWS Sports。外形採取流線型設計– 無論係耳機本身及頸帶，所以整體都好有未來感；首戴感覺舒適，亦唔易走位、唔易揈甩。
據資料，OWS即Open Wearable Stereo（開放式穿戴立體聲），其開放式耳機概念係透過空氣傳導音效，將聲音準確聚焦，並傳送到用家嘅聽覺器官，因而能夠精細咁還原聲音細節；配備埋高精度疊層喇叭同複合柔性材質震膜，以達致低音勁，高音清之效果，減少延時失真。
首先講下OWS Sports於跑步時嘅戴用體驗。
筆者雖屬細頭一族，不過戴起佢後，其耳機及頸帶嘅角度設計，令耳機整體都能夠恰度剛好咁掛於頭上，基本上亦唔使點作調校，唔太鬆，亦唔會令耳仔有壓迫感，因為其開放式設計，始終係離耳洞有段小距離。
跑步時，以筆者頭細為實測，作easy run或LSD時都冇大幅度嘅搖晃（相信你唔會衝interval都要聽住歌啩），始終保持住啱啱好嘅聆聽位置。而由於冇完全覆蓋耳洞，對於周圍嘅環境聲，亦可以有一定程度嘅留意，安全性上基本OK。
音色方面，筆者以《True Detective》第4季（Night Country）嘅開場歌〈Bury A Friend〉（by Billie Eilish）作聆聽測試，首歌對人聲同低頻嘅要求都有。首先，如果純以「默認（default）」模式去聽，都會聽得出層次分明，人聲同鼓聲平均表現。
如果想追求更澎湃嘅低音刺激，以連接「Oladance」App後嘅「澎湃低音（bass）」模式去聽，會明顯感受到鼓擊好似下下都敲緊你耳仔咁，非常過癮；想突出或細緻啲咁聽人聲嘅話，則可選擇「純淨人聲（vocal）」，人聲會更加清晰而有穿透感。另外亦設有「自定義」嘅equalizer模式，任你自行調校。
總結：OWS Sports係一款好啱跑步或運動時戴用嘅耳機，輕身、戴得牢固、唔易揈甩、防汗水雨水（IPX8級防水級別，可阻止雨水入侵，運動後亦可以直接清洗機身）；啱陪住你跑easy、LSD又或者跑跑步機。當冇人同你邊傾邊跑，又或者想享受伴有音樂嘅running me-time之時，就可以搵佢陪你！
Please follow Insports Hub on Facebook & Instagram
https://insports-hub.com/
FB
https://www.facebook.com/insportshub
IG
https://www.instagram.com/insportshub/