德國少帥拿高士文（Julian Nagelsmann）被拜仁慕尼黑辭退，事前風聲甚少，公告一出外界甚為驚訝，但同時又見到合理嘅地方。
拜仁新年後德甲三連和，三月最後一場比賽1-2比利華古遜技術性擊敗，令拜仁幕尼黑喺國際賽期前以1分之差落後予榜首多蒙特，雙方榜首大戰前率先互換位置，頓成拿高士文被炒魷魚的導火線。當然，拿高士文係球壇少有年輕有為嘅少帥，如今被拜仁炒魷魚都只係35歲，CV上已經有德甲冠軍、歐聯四強（之前帶RB萊比錫嗰陣），未來喺頂級球會搵食應該唔會太困難。但拜仁需要保持喺德甲嘅壟斷，同埋歐聯賽場嘅長期競爭力，拿高士文呢兩季，分別都喺呢兩條戰線遇上挫敗。
2020年費歷克帶領拜仁勇奪三冠王，離隊後由少帥拿高士文接手，帶領拜仁完成史無前例嘅德甲十連霸。但德甲獎盃對拜仁嚟講只係「行禮如儀」，唔能夠成為保住主帥大位嘅護身符，上季歐聯八強爆大冷比維拉利爾淘汰，已經響起外界對拿高士文實力嘅質疑。嚟緊拜仁要打多蒙特嗰場「六分波」，一個唔覺意輸咗就會落後榜首4分，另外歐聯對手係強敵曼城，拿高士文未必可以輕鬆應對。
正如上文所講，拿高士文只得35歲，戰術調配上當然唔及球壇其他頂級教練咁爐火純青。但佢勝在同球員關係好，執教思維創新，對科技同足球嘅結合非常重視，深得同樣求新嘅年輕球員歡迎。先前喺賀芬咸、RB萊比錫都展現過呢款能力，喺呢兩支球隊都有過唔錯嘅成績。
上季拜仁歐聯爆冷出局，今季就八戰八勝，拿高士文似乎已經準備好再試一次。但奈何佢嘅能力，衍接唔到管理層日漸增加嘅需求，偏偏撞正熟悉德甲生態嘅冠軍級人馬杜曹等待招聘，唯有快刀一斬，終結少帥喺拜仁唔夠兩季嘅生涯，為嘅係球隊短期內能夠再次成功。
拿高士文被炒前幾個星期，杜曹已經搬到幕尼黑，對潛在嘅新工誠意拳拳。當時面對歐洲有球隊都有可能換帥（熱刺），拜仁手快有手慢冇，快快脆換帥簽咗杜曹，期望係喺剩低嘅賽程盡量搶分，同埋喺歐聯八強對付哥迪奧拿領軍嘅曼城。回想兩年前，車路士季中換帥聘請杜曹執教，歐聯一路殺上決賽奪冠，擊敗嘅對手正正係曼城。如今相隔兩年已經出現歷史嘅輪迴。
杜曹上任後，第一個對手正正係之前曾經執教過嘅多蒙特，火花同話題都十足。雙方今季首回合交手，拜仁被多蒙特補時迫和，換成新主帥後，拜仁但求可以巔覆賽果。