Mirror演唱會意外後，幾個「二判」製作單位，包括菱藝廣告製作、中建富通旗下協興隆舞台工程、ITP（8446）相繼發聲明，都冇任何一間機構承認責任。至於大判藝能工程，個回覆就比較吊詭，講到「整個演唱會的舞台製作，由構思、設計、安裝及運作，都由多個單位負責及協商」，言外之音，似乎想表達成個舞台大家都有份起，責任一個都不能少，攬炒味濃。
收到幾位朋友inbox，大家都有個疑問，到底「藝能工程」同譚詠麟有份持股嘅「藝能環球」有冇關係？我只能話係有淵源，唔係從屬關係。「藝能工程」母公司其實係「特藝文化」，2019年初到2020年初，只係短短一年鬆啲，就已三度申請上市，但全部失敗。
根據當時嘅申請文件，特藝嘅創辦人、CEO、執董兼大股東係蔡健輝。蔡健輝1985年成立藝能工程，至2007年開始擴展業務，做埋演唱會籌辦。特藝於2015年4月至2018年9月期間，搞過600個演唱會項目。當中涉及超過400名香港及非香港藝人及樂隊，如BIGBANG、BLACKPINK、周杰倫、劉德華、劉若英、五月天及Supper Moment等等。
至於譚詠麟持股嘅「藝能環球」，根據佢2019嘅上市申請文件，「藝能工程」係獨立第三方，同「藝能環球」可以話係冇股權關係。不過，演唱會個圈咁細，你話完全冇瓜葛就當然唔係，首先，「藝能工程」係「藝能環球」嘅五大供應商之一；另外，根據當時資料，藝能環球主席葉偉忠，於2016年曾持有特藝旗下公司9%股份，不過之後已將股權沽出；第三，呢兩間個名撞到啪啪聲嘅公司，亦都非常「大方」地唔介意撞名，根據資料，「藝能環球」、「藝能娛樂」、「藝能工程」、「特高娛樂製作」都簽咗協議，講明可共用商標；最後一點，2017年蔡健輝接受內地傳媒訪問時提到，藝能工程原始股東有譚詠麟、劉德華、曾志偉，之後除咗譚詠麟，其他都相繼退股；不過睇「特藝文化」上市申請文件，就已經見唔到譚詠麟身影。
所以「藝能工程」同「藝能環球」嘅關係，除可以解讀為千絲萬縷之外；另一個共通點就係，有「股壇黑氣石」之稱嘅譚詠麟，都曾經係股東，而兩間都同樣好唔好彩地，三度入紙申請上市，但都失敗。
搞上市嘅錢，就如潑出去嘅水一樣，難收矣；不過，正所謂留底嘅都係一份心意，正正因為佢搞過上市，所以先睇到更多關於呢間公司嘅資料。睇返「特藝文化」上市申請文件，唔單止提到佢哋自2013年起，一直聘用ITP提供視覺器材，同時又詳細解釋製作演唱會流程。
有兩點值得提一提，首先，當中提到當表演器材運至表演場地後，公司會「連同來自供應商及分包商的額外安裝工人，將按照技術計劃首先量度及標記安裝位置。其後，我們將安裝及設置燈光系統、音響系統及索具器材(如有需要)，並將表演器材連接場地的電力供應。」第二點，「一般而言，需時一日至星期方可完成設置，視乎演唱會項目的規模、複雜程度及大小而定。」
最後，希望傷者可以大步攬過，肇禍原因亦可以早日查個水落石出，唔好俾人側側膊甩身。
Fortune Insight 聯乘 《華爾街日報》推出全新訂閱計劃「FI Prime Plus」，只需WSJ官網原價三分一價錢，即可同時暢讀《華爾街日報》全網內容和Fortune Insight大部份收費內容
按此訂閱：https://prime.fortuneinsight.com/web/wsj
Subscribe FORTUNE INSIGHT Telegram:
http://bit.ly/2M63TRO
Subscribe FORTUNE INSIGHT YouTube channel:
http://bit.ly/2FgJTen