心地最美麗 余慕蓮盡捐畢生積蓄

1.「御用女丑角」、著名甘草演員 #余慕蓮 退隱娛樂圈多年，近年備受各種頑疾困擾，耳石、血液炎、甚至患肺纖維化重病而曾入住ICU，幸好最後都跨過鬼門關。不過近日佢身體情況再轉差，於是聯絡摯友 #米雪 及 #安德尊 ，協助完成最後心願，就是將畢生積蓄財產全數捐出。

2.87歲余慕蓮接受東張西望訪問，豁達話，「每個人都會死，我希望死嘅時候係瞓瞓下覺去咗。」喺人生最後一段路，余慕蓮決定將自己所有財產捐畀工業傷亡權益會，「新聞中見到好多家庭因工業意外失去經濟支柱，希望出一分力讓更多人受惠。」

3.網民都留言為佢打氣，讚佢大愛，「電視做丑角，現實做大好人」、「可以推動更多人去捐錢！」、「人人都有錢，但唔係個個肯捐晒，有善心好難得！」

4.其實余慕蓮原本想低調處理身後事，但米雪認為一定要公開，鼓勵更多人！立遺囑當日，感情深厚嘅米雪同安德尊亦陪伴左右。米雪仲幫余慕蓮化妝、Set頭，打扮靚靚接受訪問。米雪話，「佢係一個好開通嘅人，所以立遺囑，或者自己生前死後點處理、去火化等等，係佢自己同我哋講。」

5.余慕蓮亦話一早告知神父唔需要風光大葬，「我冇後人拜，撒喺花園得喇啦，無憾啦！」余慕蓮指已經睇化晒，「又畀我玩多幾年，瞓醒咪賺一日囉！」

6.余慕蓮透露，大病過後，標靶藥已無效，現時需每月花費1.7萬元試新特效藥，最近精神咗，於是希望盡快完成心願。

7.余慕蓮雖然係御用丑角，但心地極為美麗，早喺71歲啱啱退休時，已捐出8萬元到貴州興建「余慕蓮希望小學」，讓山區小朋友有機會返學。佢另有一個400呎單位，喺1985年以29萬元買入，亦決定捐俾東華三院。

8.兩年前，余慕蓮曾出書《我是一條豆角》，形容自己一生成為是伴碟配菜，「我從來不是主角，只是一條豆角，我樂於做伴碟的豆角。」該書簡介亦寫到「因為愛，所以慈悲。因為死去活來，所以更珍惜餘生。」你帶畀香港人嘅歡樂同愛心，一定會感動更多人行善！

▼Follow 娛頭
Facebook: https://www.facebook.com/profile.php?id=61554772610166