《惡作劇之吻》第八度翻拍！呢次係由王大陸同林允主嘅電影，分別飾演江直樹同原湘琴，電影預計會喺出年情人節上映。近排網上曝光咗10秒鐘嘅預告片，有唔少網民都認為王大陸適合做「阿金」多過「直樹」，仲話呢個版本係「毀經典」。
其實《惡作劇之吻》20年嚟不斷翻拍，日本、韓國、台灣、大陸、甚至泰國都拍過。宜家就同大家重溫各個版本嘅男神「直樹」啦！
1. 1996年 日版《一吻定情》
呢個版本大家可能有啲陌生，但當年真係紅遍亞洲，飾演「入江直樹」嘅柏原崇被稱為「世紀末美少年」，學霸氣質加上精緻嘅五官令好多劇迷都認為佢就係「入江直樹」本人。呢套劇仲令柏原崇同飾演「相原琴子」嘅佐藤藍子喺亞洲爆紅。
2. 2005、2007 台版《惡作劇之吻》、《惡作劇2吻》
呢個版本大家一定都好熟啦，一提起《惡作劇之吻》，第一時間就係諗起鄭元暢同林依晨。鄭元暢版嘅「直樹」雖然表面對「湘琴」好冷漠，但其實好關心佢，成日暗地裏照顧佢。好多觀眾都因為呢套劇，迷上咗鄭元暢。
3. 2010 韓版《惡作劇之吻》
韓版男女主角分別係金賢重同庭沼珉，呢套劇係開播前就引起唔少話題。但開播後，有唔少觀眾都認為主演演技唔夠好，有人亦覺得佢演嘅「直樹」太冷漠，唔似鍾意「湘琴」。
4. 2013、2014 日版《一吻定情～LOVE IN TOKYO》
呢個版本開播前，好多人都唔睇好，覺得男主角古川雄輝唔夠靚仔，而且唔會超越到柏原崇版本。但開播後，好多人都被古川雄輝嘅氣質深深吸引，因為佢唔單止高大有氣質，仲真係一個學霸，簡直係現實中嘅「入江直樹」。
5. 2015 泰版《KISS ME》
泰版男主角係 Mike D. Angelo，男主角同以往「直樹」嘅形象好唔一樣，唔係斯文學霸，反而染咗成頭金髮，好多觀眾都接受唔到咁「MK」嘅「直樹」，唔知你又接唔接受到呢？
6. 2016 日版電影《一吻定情》
呢套電影係日本第三度翻拍，男主角係佐藤寬太。佐藤寬太為咗忠於原著形象，由造型到打網球都落咗唔少苦功，加上佢181cm嘅身高，都成功俘虜到唔少少女。
7. 2016 台版網劇《惡作劇之吻 MAN IN KISS》
呢套網劇男主角係《我的少女時代》嘅「歐陽非凡」李玉璽所飾演，但係就有觀眾覺得佢飾演嘅「直樹」太油膩，唔係好演到「直樹」嘅高冷。
8. 2019 內地電影 《一吻定情》
呢次係陳玉珊同王大陸繼《我的少女時代》之後再次合作，有人好期待但有人就唔睇好。
唔知你地又最中意邊個版本嘅「直樹」呢？
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）