一句激嬲全職媽媽：「你就好啦，唔洗做！」全職媽媽大平反！

上回提到，Facebook專頁「港媽的第二生活」Blogger陳栢晞，廿多歲就升級做Young Mom的爭扎。未夠30歲就退出職場做全職媽媽，她坦言聽到好多人對她的評價，言語間有些懶係尊敬的、有些帶有批評、也不乏羨慕的心聲。陳栢晞卻想反駁一些針對全職媽媽的說話，為年輕的全職媽媽平反。

1.「你就好啦，唔洗做！」

嗱！好就好在唔使幫人打工，唔使辛苦自己益咗老細，不過我都要做，就係做人媽媽，全天候準備餵奶、換屎片、煮飯同回應BB嘅訴求。餵奶，講緊高峰一日超過8次，每次至少半小時；屎片，講緊一日可能換超過6次，當中三張係屎。BB可以隨時哭鬧，大啲又要照顧到佢學習、成長需要。老實講吖，你返緊工唔洗做嘅時間，隨時多過我。仲有，你打份工打到咁渴望唔使做，轉咗佢啦，無謂嘥時間。

2. 「靚女咪可以咁後生唔洗做，等老公養囉！」

講真，呢句說話真係乞我憎至極。喂，靚女都可以好叻㗎，家陣係咪一定要標籤靚女做花瓶咁歧視？做唔做全職媽媽係有好多因素要考慮，唔關靚唔靚事。好似我咁，係父母未退休無人幫手照顧BB，屋企太細容納唔到姐姐，而幸運地老公收入穩定，我先要唔工作，選擇照顧BB。況且，照顧BB係父母責任，我作為全職媽媽都要做到嘢，老公先無後顧之憂。

3.「喺屋企咁多時間，做咩都得啦！」

每人一日都只有24小時，你點運用係唔關你喺唔喺屋企事。湊BB都係一份工作，你喺公司又何嘗唔係湊緊你老細？但起碼你會放工，你會有重奪你私人時間掌控權嘅一刻。而全職媽媽就要24小時stand by回應BB訴求，假若無一個幫得手嘅老公，基本上全職媽媽嘅時間就係被BB操控住，直至佢返學先會開始release出來。

講真嗰句，你喺公司做私人事嘅時間，可能仲多過我。只要BB扭計，我就要抱住佢，計劃好的事都要推遲一、兩個鐘，你可以話我做咩都得，亦可以話我做咩都唔係好得。最慘係好多你呢種人屈我好得閒啊！

4.「女人唔可以無自己事業！」

我明啊，無事業，無錢，假若有日touchwood離婚，要出來搵工，就好難。但係生咗仔，唔可以咁自私，要諗下做咩先對BB好，BB無咗阿媽都唔得𠻹！我夠想有事業啦，無奈香港地家庭友善嘅企業少之又少，好難湊住個仔、無人幫仲可以有事業。計我話，只要保持自己唔好同社會脫節，無現成事業都可以在適當時候創出自己嘅路。

**Follow us on:

• Facebook: CosmoHK
• Instagram: @cosmopolitan_hk
• YouTube: CosmopolitanHK**