相信每一位球迷心目中都有自己嘅偶像，而事實上呢班眾人嘅偶像心目中其實都有自己嘅偶像，佢地年輕嘅時候亦都會有同其他球迷一樣去追星，同佢地合照、拎簽名等等。而宜家重新睇番呢班現役球星當日追星嘅情況，其實都有一種傳承嘅感覺。
哈利卡尼
今屆世界盃英格蘭嘅領軍人物係前鋒哈利卡尼，呢位射手現年只有24歲，而當日佢仲係細路個陣，就曾經同碧咸影過相，而後者昔日就係三獅軍團嘅隊長，睇番以下呢張舊相真係別有一種感慨。
碧咸
而作為萬人迷嘅碧咸，雖然已經退役，並且喺美國做埋球隊老闆。不過佢小時候都曾作為球迷去追星，其中作為曼聯青訓嘅佢其中一個偶像當然就係傳奇名宿卜比查爾頓啦！
韋碧克
呢位阿仙奴射手，小時候最先係喺曼聯接受青訓的，並且喺2008-2014年效力曼聯一隊。而當時小韋碧克嘅偶像就係曼聯中堅里奧費迪南，喺「黑碧」12歲嘅時候就同里奧合照左一張。
連加特
C朗拿度係現今最出色嘅足球員之一，係唔少人心目中嘅偶像，其中包括曼聯中場連加特。現年25歲嘅連加特，2000年開始以8歲之齡加入曼聯青訓，而C朗喺2003年加入曼聯，二人曾喺訓練場碰面，C朗仲捉住連加特個頭玩弄左一下。
高基
26歲嘅高基目前係馬體會核心球員之一，而即將離隊嘅「王子」費蘭度托利斯則係馬體會此前嘅絕對核心，兩位核心喺好早之前已經碰面，當時嘅高基就只有9歲(右面第二位)。
麥巴比
作為現今足壇嘅超級新人王，法國前鋒19歲嘅麥巴比可以話前途無限，而佢就曾經同法國傳奇射手亨利及C朗拿度合照過，當時嘅麥巴比真係好可愛，估唔到黎到今日已經變成身價過億嘅超級射手。
尼馬
雖然目前仲未100％康復，但作為巴西領軍人物嘅尼馬仍然備受期待，外界仍然期望佢可以帶領巴西喺今屆世界盃有所作為。而年小嘅尼馬，其偶像當中當然有巴西傳奇射手朗拿度啦，個陣嘅合照朗拿度仲係好Fit呢！