香港獨家嘅主題樂園-海洋公園新起左大型設施，就係酒店喇！呢度最近先開放試業，小編帶大家睇下有咩設備啦！
酒店位於樂園附近，玩完行獨立天橋過去好方便！
有3座建築，分別係「Pier Wing」、「Club Wing」同埋「Marina Wing」，共提供471間豪華客房同埋套房！宜家可以透過電郵同電話方式租房，最快要11月14日先可以入住～
房間有唔同嘅特色設備！
好似有適合小朋友嘅主題房：以熊貓為主題嘅包包天地、有小紅貓公仔嘅小紅熊森林、海洋公園嘅主角-威威做主題嘅威威船艙～
加錢將房間升級，仲可以望到湖景，夜晚特別靚嫁！
「Pier Wing」同「Marina Wing」嘅房大細差唔多，最大嗰間有 59平方米；「Club Wing」嘅總統套房有成 153平方米咁大！
最平嘅套票盛惠$2700/2個成人，包括早餐自助餐、海洋公園一日入場券、$300海洋公園現金券！
酒店有好多細節位都好用心！為左響應環保，已經逐漸引入可分解循環嘅紙包水去代替難分解嘅膠樽水！喺裝飾方面，都以溫馨嘅感覺為主，適合家庭同樂～
酒店設有全港島最大嘅無柱宴會廳，有成 2000平方米、最多擺到 80圍，仲有好靚嘅燈裝飾，舉行周年晚會同宴會都好啱嫁！宴會廳出面嘅樓梯有座三層高嘅魚缸，好宏偉！不過為左製造個合適海洋生物生活嘅環境，要到下年先有魚魚睇喇！
去酒店當然唔可以錯過泳池啦！呢度有個以礁湖為主題嘅戶外游泳池，成 1410平方米咁大嫁！
泳池俾3棟建築包圍，可以睇哂酒店好有獨特嘅設計！不過尚在整理階段，預計年底會正式開放～
酒店亦設有4間主題餐廳，滿足唔同客人嘅需要！
如果想食buffet，就可以揀位於「Marina Wing」嘅 Marina Kitchen & Marina Cafe，由朝早 6時 30分至夜晚 11點都有野食，cafe就由早上 8點營業至 夜晚 8點～
為左配合環保嘅理念，呢度會依照WWF嘅指標去提供環保海鮮～
大部份熱食都係廚師新鮮即製，仲可以品嘗到米芝蓮 1星嘅叉燒添！
而喺「Club Wing」就有2間特色餐廳，分別適合好酒人士嘅 Prohibition Gill House & Cocktail Bar 同埋鍾情中菜嘅 南海小館～
兩間餐廳嘅裝修都好別樹一幟，Prohibition Gill House & Cocktail Bar係一間酒館扒房，以舊時美國禁酒時期為主題，好有特色；南海小館就以簡單中式設計做主打，配合木材同中國風餐具營造舒適感！
「Pier Wing」嘅Pier Lounge & Pier Bar就行簡約歐美風格，好啱工作人士嚟呢度聽下歌、足歎下咖啡，享受下休閒嘅下午～呢度Bar嘅天花好似外國火車站，啲裝飾行西歐懷舊風，好啱打卡嫁～
除此之外，酒店仲有好多設施，好似Spa 同Fitness Center、戶外活動空間！
有興趣，就嚟預約chill下啦！
《海洋公園萬豪酒店》
地址：香港仔黃竹坑路180號
預約電話：3555 1688
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）