30歲女生，投身職場至少也有8年了。工作好一段日子，相剛入職的fresh grad，自己已是old seafood資深前輩；但與40、50歲的上司比較，又似是經驗稍遜。30歲女生事業走到樽頸位，唔上唔落，就會使人迷失，開始想轉工還是等升職這問題。到底邊個選擇先適合你？
問題1. 應該轉工還是等升職？
人到30歲，假如喺公司工作安穩，就會不經不覺跌入comfort zone，對工作得心應手，同事間相處又舒服，甚至被他們視為資深員工，有咩事都向你請教，上司又器重你。不過留在同一公司太久，即使年資高，對其他公司HR來說經驗過於單一化。相比同齡但有兩三份工作經驗的人而言，你嘅競爭力相對較低，再留落去，只會拖累你的CV，日後想跳槽就更難。
問題2. 在同一公司繼續上位有幫助嗎？
好多人會跳「草裙舞」，放風話想走，公司出動高薪留你，聽落好吸引，而且你出到去未必搵到同一職級，令你心思思想留低？呢個時候要諗諗你的新職位的工作性質係咪有分別。要知道好多工種名義上升咗職，實際工作與原本無異，例如marketing manager仍然似剛入職的同事一齊寫facebook feed，又或者部門只有你和上司兩人，升完職都無管理下屬的機會，這樣的「升職」又有無意義呢？所以跳草裙舞前，要考慮好這幾點！
問題3. 你以事業抑或家庭為重？
事業女性以工作為先，即使結婚都不打算生小朋友，30歲正好是拼搏之齡，為事業闖一番天地；另一種女性以家庭為先，最需要一份安穩出糧、不用OT的工作，準時收工回家煮飯。如果你係後者，即使工作遇上樽頸無突破，也未必適合轉工，因為新公司會對你有所期望，尤其擁有一定經驗，想hea做就有難度！
問題4. 轉行的話，可接受重新再來嗎？
身邊有朋友剛達29+1之齡，發現該行業再發展下去沒有太多學習機會或前景，所以有轉行念頭。但社會好現實，30歲先嚟轉行，除非你創業，否則要承受到外界當你零經驗從頭學起，又要由低做起，不恥下問，不能以自己8-10年工作經驗恃著前輩身份命令後輩。
問題5. 30歲女生應該裸辭嗎？
裸辭，看似不負責任的行為，只會出現在剛踏入社會的小伙子身上，但其實30歲女生也會有這個衝動。此時你要想想：「裸辭目的是什麼？」休息再重新出發？學習新技能？裸辭做Slasher？生小孩再投身社會？想好目標，權衡利弊，確定自己在待業情況下仍有足夠經驗能力過日子，裸辭後有信心搵到相同甚至更好的工作，不後悔放棄現職，那就去馬吧！
**Follow us on:
- Facebook: CosmoHK
- Instagram: @cosmopolitan_hk
- YouTube: CosmopolitanHK**