上個月尾，中大醫學院喺Facebook緊急呼籲，希望可以籌到200萬比患有罕見癌症嘅張可仁小朋友做醫療經費。
唔少城中富豪都慷慨解囊，希望可以幫助患癌小朋友渡過難關。截至目前為止，中文大學慈善基金會一共籌得約1,700萬元善款，包括劉鑾雄慈善基金捐出690萬元、無名氏捐出340萬元、李嘉誠基金會捐出200萬元、古天樂慈善基金捐出20萬元同埋張安德慈善基金捐出10萬元。
「劉鑾雄慈善基金」喺新聞報導得知張可仁小朋友患上罕見癌病，急需要經濟援助支付免疫治療嘅費用，就即時主動聯絡咗「香港中文大學校友慈善基金」嘅負責人，即時捐款690萬，幫助張可仁一家渡過難關。小可仁嘅爸爸張俊傑醫生，係中大醫學院2000年醫科嘅畢業生。小可仁喺出世第4日，已經被診斷罹患一種罕見嘅心臟病「主動脈狹窄」，需要接受緊急手術。小可仁最近再被確診患上「第四期神經母腫瘤」，有癱瘓危機。
可仁嘅治療方案包括化療、手術、放射治療、骨髓移植、免疫治療，為期一年至一年半。但免疫治療需要病人自費，費用高達港幣200萬元。張醫生另一個仔患有自閉症，太太為咗照顧兩個仔，辭咗小學主任嘅工作。張醫生仲要負責照顧父母親，經濟上未能承擔高昂嘅醫療費用。
中大校友慈善基金表示今次募捐已經超額完成：「我們將於2018年12月3日终止是次募捐行動，謹此感謝各中大校友、社會人士及各慈善基金會的熱心慷慨大力支持。 是次行動充分反映香港人的大愛精神，值得我們驕傲！」
人間有愛，希望大家之後都可以繼續關心患罕病兒童。
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）