【CONY開箱】韓國軟嫩雞胸叮2分鐘即食　健身人士必Like

好多人都問點解CONY食極唔肥，除咗因為天生麗質，都有後天努力㗎。講到keep fit，CONY絕對唔會節食，只會慎選食物，多菜少肉係基本，肉類方面，低脂高蛋白嘅雞胸肉當然唔少得。不過雞胸肉總畀人冇啖好食嘅感覺，因為好易煮到佢又韌又「鞋」。韓國的健康食品公司Rankingdak就想打破呢個概念，研發出質感軟嫩嘅即食雞胸肉，就連金鐘國和Haha都曾在節目中推介。品牌近日正式抵港，到底係咪真係咁嫩滑？睇下CONY嘅試食報告啦！

現時品牌約有30多款產品，均以韓國本土的雞胸肉製成，至於在本港有售嘅暫時就有10款。今次CONY試食佢地嘅皇牌產品「Masitdak軟滑雞胸」、「Loveeat慢煮軟滑雞胸」及「Cheepoomdak芝士雞胸」。三款的卡路里約110至143卡不等（參考：100克燜瘦豬肉約233卡；100克烤瘦牛柳約200卡），而且從雪櫃拎出嚟直接叮或烚2分鐘就食得，絕對係懶人恩物。想香口啲，亦可以解凍20分鐘後煎熟就食得。

「Masitdak軟滑雞胸」據說以遠紅外線烤過和蒸煮煮熟，再以大蒜或韓國青陽辣椒調味。另一款「Loveeat慢煮軟滑雞胸」，以覆膜技術烹煮，號稱係市面上有史以來最軟嫩多汁的雞胸肉。

CONY覺得兩款嘅肉質真係比平時食開嘅雞胸肉軟滑，亦唔會太乾。味道方面，胡椒味微辣，亦食得出青椒味；反而蒜味唔算突出，CONY有少少失望；至於原味雞胸則味道帶甜，就咁食又得，簡單配個沙律食都得。三款口味都勝在唔會太重口味，調味剛好。

如果鍾意重口味或芝士嘅朋友，CONY就推薦「Cheepoomdak芝士雞胸」。經橡木煙熏處理的雞胸肉，包裹著低脂芝士，就算係減緊肥嘅朋友都可以放心食用。坦白講，呢款嘅肉質比以上兩款軟滑雞胸札實，但就好惹味，芝士亦有少許流心效果，CONY覺得佢喺味道方面取勝。

試食完畢之後，CONY覺得幾款雞胸肉嘅味道不俗，其中Masitdak和Loveeat2款肉質較軟嫩，而且容易烹煮，除咗注重健康人士，CONY仲覺得好適合兩小口都係上班一族嘅家庭，因為好多時放工都唔夠時間買餸，又唔想成日出街食，喺雪櫃拎舊雞肉，配搭意粉或沙律就變成一頓簡單健康嘅料理。

銷售點：網上商店、百佳超市