本周朱太（朱李月華）宣佈私有化旗下嘅金利豐（1031）。近幾年殼股冇運行，估唔到殼后連自己個「殼」都不保了，正所謂「不在乎天長地久，只在乎曾經擁有」殼后個「朵」。
過去20年，朱太喺金融市場呼風喚雨、點石成金；凡有資金困難嘅民企或港企都要向朱太叩門，其超卓財技肯肯定冇人能及。
朱太憑藉老父「樹福」昔日喺何鴻燊麾下搞賭廳，奠下基石，再乘着澳門賭權開放，北水湧入澳門及香港上市公司，成就咗佢一代「殼后」之名。
有段時間，喺金融界撈，如冇同朱太打過交道，真係好打有限。時移世易，隨着賭王四太且戰且退，朱太亦順理成章「轉身」而去。
其中一瓣肯定轉得華麗就係「食」，唔係食殼呀，係食好嘢。
【富豪飯堂搬竇】
自從從福臨門太子爺Duncan手上接管咗檔富豪飯堂後，朱太都好有心機去搞。
尖沙咀福臨門（九福）準備下月搬去九龍灣金利豐國際中心，朱太問員工意見，要頂樓或是二樓好，最後寧願要二樓，皆因可用明火，頂樓只可用電，咁大廚先至發揮得到。
朱太仲諗住用會所形式經營，安裝埋karaoke，又係嘅，依家你估易招租咩？搵自己個飯堂嚟塞返啲位，先至好好睇睇，唔使全日空。
至於尖沙咀福臨門舖位，早前賣咗俾西方寺做齋菜館，袋番1.2億，咁就善哉善哉阿彌陀佛。朱太借錢出嚟又點會無渣嗱呢？
【她來自鴨脷洲】
舊年朱太抱孫，由福臨門搞到會。有次喺灣仔福臨門，一開門見一樓放滿一樽樽薑醋，很是大堆頭。
朱太交友廣闊，經常以食會友，分甘同味。以往禾花雀未禁前，朱太使人從大陸運煮熟咗嘅禾花雀來港，送俾友好品嚐。
來自鴨脷洲嘅朱太，對食魚特別有要求，尤其喜歡「一夜情」。嗱，唔好咁多遐想，係搵條鮮魚，用鹽醃製一晚，咁就為之鹹鮮魚，馬友係首選。
朱太飯局後，有時向友人送上「一夜情」，真係又食又拎。每年朱太係鴨脷洲搞盆菜宴益下老街坊，佢老媽子仲會整好多樽「油浸鹹魚」 俾朱太派街坊。
【熱心紅娘】
以食會友之餘，亦熱衷當紅娘，城中有位大家族女強人同老公離婚，朱太立即介紹唔同類嘅女子俾呢位失婚男，運動型又有，事業型都有，以解其空虛寂寞。
當中不乏電視台嘅姐仔，朱太亦好疏爽，城中寸嘴富豪都借過她的私人飛機。
一代殼后，喺新時代下祝福她華麗轉身。
Louise
https://www.facebook.com/louisewong15
註：專欄作家言論不代表本網立場
密切留意BossMind動向！立即CLS