今日，就比呢班阿根廷球迷盡興一番。
呢個世界盃冠軍，代表住美斯對宿命嘅不屈，喺35歲高齡依然能夠成就傳奇。呢個世界盃冠軍，代表阿根廷球迷苦等多年，終於有撥開雲霧見青天嘅一日。呢個世界盃冠軍，代表阿根廷一眾後輩，終於可以以一個大力神盃，向已經逝去嘅球王馬勒當拿致敬。
八年前喺巴西，阿根廷同德國纏鬥120分鐘，最後喺一個防守犯錯之下輸0-1，嗰種不甘同不忿，到今日喺卡塔爾一次過補償。當年決賽陣容，到而家只剩美斯同迪馬利亞兩個大佬，依然有能夠留喺度，成就當年做唔到嘅高峰。
而阿根廷呢條冠軍之路一啲都唔易行。自2018年十六強輸比法國之後，阿根廷決定換教練團，戰術深度同團隊氣氛都有進一步提升。而球員各自喺自己球會生涯嘅進步，令阿根廷有唔少可用之兵。佢哋未必個個世界級，整體星味甚至比巴西、英格蘭、法國等等熱門球隊差。呢方面，要歸功於以史卡朗尼為首嘅球練團，點中球隊嘅弱點，各個細節上互相彌補，同時發掘陣容更多組合同可能性，而唔再好似十幾年前咁，將所有天賦異稟嘅球員推哂出場打天才波。
上年嘅美洲盃冠軍，係阿根廷改革過程當中，一張相當唔錯嘅成績單。但佢哋知道，相隔一年半嘅世界盃，先至係球隊嘅終極目標。
而不幸嘅事好快發生，美洲盃過後，巴塞隆拿冇辦法同美斯續約，而阿古路亦因為心臟問題提早退役。過一個球季之後，盧施素受傷缺陣，迪巴拿、迪馬利亞差啲踢唔到，反映出阿根廷嘅奪冠之旅，都唔係咁穩陣嘅事實。第一場爆大冷輸比沙特阿拉伯，更加令奪冠之路蒙上陰影。
然而，阿根廷馬上痛定思痛，小組賽最後一場生死戰開始，球隊就圍繞住麥亞里士打、迪保羅、安素費南迪斯呢個中場三角嚟踢，自此一直晉級到底，直到喺決賽成功登頂。而呢段時間，唔只教練團變陣得宜，美斯嘅個人發揮，繼續突破呢支球隊嘅天花板。
決賽對手法國可謂大熟大勇，全體球員不斷對阿根廷後防線嘅壓迫，中場幾乎跑不死嘅氣力，加上麥巴比喺壓力之下嘅神勇發揮，同阿根廷合演一場極具觀賞價值，同時兼具戰術鬥法嘅世界盃決賽。
拿達路馬天尼斯嘅失準、教練團喺換走迪馬利亞一事上作出嘅決定，以及球員喺甚少防守犯錯之下依然輸兩個十二碼，導致呢場比賽撳爆平安鐘，呢啲都通通值得檢討。但要阿根廷賽後之所以有資格檢討呢場決賽嘅細節，前提係要入到決賽先，而佢哋真係做得到。
恭喜阿根廷，恭喜美斯，恭喜每個一齊見證呢一切嘅球迷。