24/25賽季英超開幕戰，曼聯主場對富咸，話題性十足嘅曼聯季前接連引入前阿積士球員，球隊又鬧傷兵潮，因此今日4-2-3-1陣式由般奴踢正箭頭，美臣蒙特踢攻擊中場，右翼由阿曼迪阿路擔任，至於右閘位置則由新援馬沙拉奧(Noussair Mazraoui)頂上。另一邊嘅富咸今個夏天都有唔少變動，主力球員包括韋利安(Willian)、柏連拿(Joao Palhinha)、波比列特(Bobby Reid)同艾達拉比約(Tosin Adarabioyo)都離隊他投，今日4-2-3-1陣式右翼起用「油王」阿達馬查奧爾(Adama Traoré)，而攻擊中場就有史密夫路維(Emile Smith Rowe)擔正。
作客嘅富咸進攻時轉成4-1-4-1陣式，史密夫路維同安達斯彭利拿分別為左右攻擊中場，伊禾比內切，而右翼查奧爾已經係上半場富咸進攻唯一亮點，因為富咸更多嘅時間在於低位防守，塞位遮線迫使曼聯靠邊路進攻，當曼聯右翼迪亞路係右路盤球，就會由伊禾比同羅賓遜二人嚴密看管。
曼聯方面實際上4-2-2-2陣式，般奴同蒙特企到最前，比起上季鬥攻形勢，今日上半場大部份時間都係控球在腳，28分鐘對方門將蘭奴(Bernd Leno)失誤直接將皮球送出，般奴用腳面一彈被撲出。34分鐘曼聯中路撞牆小範圍組織，般奴門前撞射再度被蘭奴撲出。上述兩個威脅未能轉化成入球雖然可惜，但係亦睇到前場逼搶同進攻上嘅改變，暫時曼聯進攻焦點主要為中路撞牆同右翼突破，而上半場則被富咸以低位防守堵塞空間，因而未有破門。
下半場富咸開始壓上前場逼搶令場面變得開放，包括有兩次快速反擊2打1或4打3嘅場面，但無奈球員走位同把握力問題未能取得入球。60分鐘曼聯換入加拿祖同今季來投嘅施亞斯(Joshua Zirkzee)，兩隊一直互有攻守直到87分鐘，施亞斯禁區接應加拿祖傳中一印入網，地標戰為曼聯貢獻第一個入球，而曼聯亦憑着呢一個入球存取3分取得開季第一勝。
富咸方面今日進攻力相當不濟，右翼查奧翼確實有飛快嘅速度同強壯身形，但只係用身體踢波並無用頭腦去踢波，俾波同走位都唔係最佳選擇。左翼伊禾比又欠缺突破能力，後備換上嘅進攻球員更加係無表現，今場球隊踢得比較好嘅只有兩閘同門將，所以富咸絕對要係兩翼位置作出調整，或者今季引入嘅施斯隆(Ryan Sessegnon)會係答案之一。
曼聯今日表現比起上季有所改善，上半場控球在腳，其間蒙治有勤力逼搶，卡斯美路有幾次攻門，新球員馬沙拉奧波底唔錯，而下半場則未能繼續以控球統治比賽，互有攻守嘅時間幸有麥佳亞同馬沙拉奧交出良好防守，最後新援施亞斯破門更為驚喜，佢嘅活動範圍較大，唔係傳統企喺最前方嘅中鋒。總結曼聯今場整體發揮唔係100分，畢竟係開季第一場，但已經比上季表現好，今場取得3分希望可以為球隊取得一個好開始。
▼Follow 足球港場
Instagram: https://www.instagram.com/footballarena_hk/