【獨媒報導】香港男子足球代表隊晉身亞運四強，取得歷來最佳成績，球隊今日下午返港。隊長胡晉銘對《獨媒》表示：「想同球迷講唔好意思，自己都係好想攞個獎牌返嚟，做唔到的確係有啲遺憾。」他希望港隊隊友能把握時間，一起推高狀態迎戰明年1月亞洲盃決賽周。守門員謝家榮則指，會繼續努力做出更好成績，與香港共同進退。
胡晉銘對不敵烏茲別克感失望 惟對整體感滿意
港足一眾職球員下午乘飛機，從杭州返抵本港，獲球迷接機歡迎。25歲的胡晉銘除了是港隊三名超齡球員之一，亦是球隊隊長。胡晉銘對《獨媒》指，球隊在擊敗伊朗後超興奮、超開心，但在四強、銅牌戰接連大敗：「的確係失望嘅，短短呢六、七日⋯⋯有啲覺得前功盡棄，但無可奈何，真係有啲技不如人。」
胡晉銘形容，銅牌賽硬撼烏茲別克是人生最重要的賽事，但對表現不似預期感失望，透露部署原希望避免失波，至60至70分鐘與烏茲別克一決勝負，但對整體感到滿意，「創造到歷史」。
多方面須改善 胡晉銘：要一齊努力，唔係一朝一夕
守門員謝家榮在賽後接受電視台訪問，希望球圈持份者，能努力團結改善香港足球環境，令港隊能恆常地晉級亞運四強，他期間激動落淚，片段獲球迷轉發。胡晉銘則稱每一名球員都知道該是事實：「事實係難聽，但當你要同亞洲一線、二線嘅球隊去競爭，呢個係無得避免。體能、技術，可能再遠啲對戰術嘅理解，香港球員的確係比亞洲其他一線、二線球員差，呢個大家要一齊努力，唔係一朝一夕。」
此外，胡晉銘亦承認港隊今次有幸運成份，才能殺入四強：「好似家榮話齋，香港希望可以成為亞洲一線二線球隊，就可以keep 住都有好成績。」在今屆賽事中，港隊三度與烏茲別克交手均落敗，《獨媒》問到雙方的分野，胡晉銘就指烏茲別克球員，在中前場的組織力、創造力都較港隊強，但體能、防守意識及企位其實不相伯仲。
至於今次賽事最大得著，胡晉銘指港隊在賽前僅得4至5課「齊人」練習，如何在短時間內理解教練要求，及作為超齡球員要令年輕球員融入球隊，加上U23早前在亞洲盃外圍賽失望而回，全部都需要作出調整；對外則有機會增長見識，自己亦首次與伊朗交手，了解其他國家的足球水平及文化。
北上陷谷底 李毅凱視亞運重新開始
另一名超齡球員李毅凱則對《獨媒》稱，能為港隊創造歷史感高興，對未能取得獎牌感到遺憾，「我哋兩場都盡咗力，對手都好強，有差距」。29歲的李毅凱早前結束北上之旅，在今季回歸本地球壇，加盟標準流浪。李毅凱有感而發稱：「最緊要自己唔好放棄自己啦。被人放棄嗰時，最緊要有動力做返好，所有嘢唔好怕，咁自己真係好鍾意足球。」
李毅凱透露，與南通支雲管理層發生了不快事情，失去上陣機會，導致一直缺乏狀態，最後主動要求解約離開：「覺得返咗大陸無成功過，自己覺得好唔開心。谷底嗰時希望自己可以做返好，踢返好俾人睇，亞運當重新開始。」
曾想過放棄足球 李毅凱：珍惜機會
球迷多年來戲稱李毅凱是「球霸」，今屆亞運蛻變成長，在港隊後防線上指揮若定。李毅凱就向《獨媒》指，在內地不如意的時候，其實曾經想過放棄足球：「嗯，諗過應唔應該踢落去，自己諗咗好耐，自己又鍾意踢波，踢咗好多年，但疫情之後環境又唔好⋯⋯。嗯，我真係好鍾意踢波，對足球好有熱誠，無放棄到⋯⋯。之後就搵球隊，咁啱流浪又一拍即合，難得亞運又補選咗我，呢個機會要好好珍惜。」
李毅凱亦對記者承認，自己昔日較衝動、「收唔到火」及「唔識諗」，但經歷了北上的日子，學會「咩都要靠自己」，必須設法融入當地生活，「所有嘢都係經歷嚟，每一個經歷都會令自己成長」。然而，李毅凱念念不忘外流夢：「呢個係細個嘅夢想，自己之前又未成功，希望好好珍惜今次大型比賽，令人賞識我，珍惜下一次外流，想踢出嚟睇係成功嘅。」
謝家榮感謝球迷重新接納 如有機會必定外流
至於港隊功臣之一、守門員謝家榮，他在賽後的真情流露，感動了不少球迷。謝家榮對《獨媒》稱，原以為只能參加一個星期的賽事，但卻成為了三個星期的奇妙之旅：「好遺憾未必可以係最好嘅ending，雖然入咗四強已經好好，但攞唔到銅牌返嚟，個刻就覺得有啲遺憾。當時感觸，呢個旅程就嚟完啦，因為唔知下一次可以代表香港隊，入到大賽到呢啲階段係幾時。It’s now or never ，可能之後未必再發生。」
現年24歲的謝家榮，他在前年代表香港足球U23代表隊出賽期間，與隊友在日本醉酒鬧事，一度被罰停止徵召一年，他當時對參與亞運已打定輸數。但杭州亞運因新冠疫情延期，謝家榮最終憑著出色的表現打動主教練安達臣，趕上尾班車。
謝家榮對記者表示，希望球迷看到其努力，「重新接納返我」：「好感謝，以前有啲犯錯，希望忘記佢。我會繼續努力做更加好嘅成績，俾自己、香港球迷，同支持我嘅人睇到，同香港共同進退。」被問到會否希望到外地聯賽效力，謝家榮就稱如有機會，必定會一試。
記者：麥馬高、周頌謙