《KATCH OUR LIFE 陳蕾 x 洪嘉豪 x 魏浚笙 音樂會》將於2024年11月16日在亞洲國際博覽館Arena舉行。陳蕾、洪嘉豪Kaho及魏浚笙Jeffrey首度同台演出，近日密鑼緊鼓作最後準備。三人為今次音樂會費盡心思，開show前都特別透露了rundown上的可行性。
今次三個人一齊開show，合作環節當然少不了，三人合唱的可會是甜蜜還是傷感情歌？陳蕾十分肯定的說：「甜蜜！我好活潑可愛，我哋三個一齊嘅vibe都幾歡樂，所以會想喺台上將呢一面帶俾大家，可以唱一啲輕鬆合唱歌。」不過陳蕾與嘉豪本身很老友，經過今次合作後，Jeffrey的加入亦令歡樂氣氛昇溫。為了避免笑場，嘉豪提議道：「不如你唱，我彈琴！」陳蕾也覺得idea不錯：「幾好喎，好有氣質，你唔出聲？OK！最好唔見樣，淨係見到隻手，但我驚我淨係見到隻手都想笑，因為我一望到嘉豪就好想笑，所以好緊張呢個show，希望到時唔好失控，因為試過同嘉豪要拍啲好認真嘅嘢，我都係笑到停唔到，好怕呢啲嘢會發生，所以〈永久損毁〉都係同Jeffrey唱好。」嘉豪聽罷即表示：「可以夾返企位，譬如三個合唱，你淨係望住Jeffrey，咁咪得囉！」
至於嘉豪與Jeffrey因為拍電影而成為好友，Jeffrey回憶道：「我哋喺現場唱好多歌，大聲唱，發現原來大家聽嘅歌都類近。」二人一見面更是「雞啄唔斷」，更頻頻爆出笑位，令現場工作人員笑得合不攏嘴。嘉豪表示：「可能大家都好expect我哋喺台上會有啲類似棟篤笑嘅嘢，但係都唔需要，因為我哋平時嘅交流都已經會有咁嘅效果，再加上talk位唔set好都會有爆肚，所以今次音樂會會focus返音樂，呢個組合都新鮮，可以rundown上面有一首陳蕾嘅歌，我哋三個、兩個、一個會點演繹，喺音樂上都會好精彩。」Jeffrey十分認同：「今次應該可以呈現到我哋不同面向，平時大家未必見過嘅一面。」
Jeffrey表示，今年其實好幸福，他解釋道：「今年年中同三個朋友仔開show，年尾又有陳蕾同嘉豪，係一個好創新嘅體驗，同嘉豪已有一定默契，眼神交流已經可以心領神會，陳蕾係新相識嘅朋友，發現同嘉豪都係同vibe，覺得係一個好開心嘅組合。」