Ray Online｜余德寶助「賣豬仔」港人　陳穎欣質疑鋪路參選

近期港人被「賣豬仔」去緬甸詐騙園區事件備受關注，受害家屬亦都紛紛向泰國駐港總領事館同香港政府求助，不過竟然係由前公民黨油尖旺區議員余德寶幫手。工聯會立法會議員陳穎欣就質疑因為今年係立法會選舉，余德寶係鋪排參選喎。

作為「KOL」嘅工聯會「小花」陳穎欣喺YouTube拍片，話余德寶可能見到大勢所趨，「攬炒」唔再有市場，今次係為參選鋪排。佢質疑余德寶「有事想搵中央，轉軚轉得太快」。講講吓，陳穎欣仲評論對方嘅外表，話余德寶相對當年發福「歲月真係催人」，但「化灰都認得佢」。

指回應陳穎欣是浪費時間

余德寶喺社交網站公開反駁，強調無意復出參選。佢解釋上年9月收到街坊求助，佢由衷希望幫手。今次出嚟都面對唔同壓力，包括收到一啲「不明來歷」人士滋擾。至於家屬同保安局開會，余德寶話因為佢唔係家屬，當時被保安局拒絕參與會議。佢直指現行立法會議員，包括陳穎欣，應該好好反省，每月坐擁10萬蚊嘅人工同資源，竟然冇收到家屬求助，點解係由一個前區議員協助港人？「可能陳議員忙於坐商務客位到日本外訪」。佢又忍唔住訴苦，話同家屬每日勞碌奔波，仲要回應陳穎欣根本係嘥時間，佢希望大家將焦點集中喺「拯救港人，盡早回家」。

原文刊登於 AM730

睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)