「視帝」陳展鵬同單文柔去年正式拉埋天窗，婚後1個月更宣佈有喜。單文柔佗B之後就較少公開露面，不過呢日佢就同班同為港姐嘅姊妹見面，已經佗B五個月嘅單文柔個肚已經非常明顯，成班姊妹合照時更喺佢個肚上擺出心心手勢，場面非常溫馨！
原文：Sundaykiss-Kammy｜圖片來源：Instagram
單文柔佗B五個月
42歲「視帝」陳展鵬同28歲單文柔拍拖2年，二人於去年結婚並宣佈有喜！今年係單文柔婚後第一次以人妻身份過年，呢日同屆港姐劉穎鏇及魏韵芝，以及同係「美女學徒」嘅鍾晴就去咗佢屋企到拜年。至今已經佗B五個月嘅單文柔，個肚已經非常明顯，班姊妹仲送咗BB衫畀單文柔𠻹！
姊妹聚會當然要影合照留念啦，相中見到素顏嘅單文柔孕肚非常明顯，唔少網民都讚佗得好靚！而成班姊妹合照時仲喺單文柔肚上擺出心心手勢，場面非常溫馨！
陳展鵬Ready好陪入產房
早前，陳展鵬亦都上載一張上育嬰班嘅相片於社交平台，相中佢戴上口罩，一隻手拎住尿片，另一隻手托起BB雙腳，親自幫道具BB換尿片，仲留言：「豬爸爸豬媽媽Are you Ready🤘🏻I am Ready」其後佢更表示，對湊B好有信心，已經安排好晒營養師、產前產後配套同陪月，最重要就係已經準備好陪太太入產房，仲話「呢個年代，男人唔陪太太入產房同唔去照顧小朋友係犯法㗎，要報警！」
BB改名做「阿Q」
雖然陳展鵬同單文柔希望舉行完Baby Shower先公開BB性別，不過佢哋就已經諗好BB嘅英文名係Q字頭，因為父母嘅英文名字頭係R（Ruco）及P（Phoebe），夾喺R同P中間係Q，所以想「小豬脾」英文名都想係Q字頭，或簡稱「阿Q」，仲話：「寓意人見人愛，開開心心，因為豬B係可愛同有福。」
陳展鵬陪大肚老婆齊齊戒口
單文柔同大多數女生一樣喜愛食甜品，但孕婦忌吃太甜，唯有戒口。除咗甜食，陳展鵬更透露榴櫣、士多啤梨、麻辣火鍋、生冷食物如魚生、瀨尿蝦、大閘蟹、凍飲同雪糕等通通都唔食得。
陳展鵬：「點會偷食呀！」
於是，廿四孝老公陳展鵬，決定陪大肚老婆一齊戒口。老婆唔食得嘅，自己都唔食，佢仲話：「點解我唔食得？？？法官大人冤枉!!!!! 」
話雖如此，當陳展鵬被問到會唔會去「偷食」時，他甜蜜地回：「我差不多每一餐都同佢一齊食，點樣偷食呀！」仲Man爆咁話：「我依家同佢一樣，都唔食得呢啲嘢！」
網民們都大讚陳展鵬好男人，「老婆最大！ 」、「哈哈 乖！聽老婆的話 」、「一句講哂 老婆大哂」，非常羨佢哋夫婦甜蜜！
延伸閱讀：
單文柔晒吊帶大肚寫真
單文柔首次晒孕肚，佢喺Ig貼咗一張身穿白色吊帶裙嘅寫真照。可以清楚見到腹部隆起，唔少網民紛紛猜測佢懷孕約5個月，旁邊更有鮮花襯托，仙氣十足呀。
單文柔留言話﹕「你們的假期過得好？ 剛剛過了我最喜歡的節日。今年。。。買了一棵真的聖誕樹，有好香的松樹味，佈置了我們的家，做了兩頓晚餐，在聖誕樹下準備了禮物，看了一場戲。最重要是今年可以和你一起度過。」
陳展鵬與單文柔大搞婚後派對
陳展鵬與單文柔於十月結婚後宴請一眾圈中好友出席於中環舉辦嘅婚後派對。陳展鵬拖住身穿粉色低胸裙嘅單文柔，雖然結婚兩日，但兩人似乎已經適應咗新身分，單文柔就笑住講：「婚後有多咗一種責任感，會想更好咁照顧佢！」聽完都覺得好sweet呀！
索爆人妻王君馨昨晚就單拖出席派對，君馨就話自己布咗利是嚟祝福新人，表示：「因為我都啱啱辦過婚禮，知道花費唔少，所以好實際，希望我俾嘅利是可以令佢哋過一個更甜蜜嘅蜜月！」而且君馨更催促展鵬早日造人！咁唔知佢又會幾時有造人好消息呢？
馮盈盈 麥明詩 齊齊現身
馮盈盈、麥明詩及丁子朗就齊齊現身，當問到盈盈同Lousia準備咗啲咩嚟賀一對新人，Lousia就話自己準備咗利是祝賀新人，至於盈盈坦言自己冇錢：「所以禮不到我人到，心意補夠！」，聽落都慳幾水慳力！
馮盈盈漏口要做單文柔BB契媽
當被問到會唔會羨慕單文柔咁早就結婚，Lousia即話羨慕佢搵到個好老公，仲話最緊要係對方錫同埋長久幸幸福福，同埋生多個BB。點知盈盈馬上補充話自己到時可以認做契媽，隨即被在場傳媒誤以為單文柔有咗BB，之後盈盈先補鑊話：「唔係！」
其後，盈盈表示有介紹男友嘅醫生朋友俾麥明詩認識，問到有冇機會發展，Louisa就表示暫時可以做朋友。當問到身邊嘅丁除朗啱唔啱心水，Louisa指自己唔介意姊弟戀，不過就從未試過。照咁睇，現階段咩類型嘅戀愛都有可能發生喺Louisa身上！
煎Pang九月宣布結婚
九月10日，陳展鵬率先在無綫的Big Big Channel宣布婚訊，同晚向傳媒發聲明，正式宣布與28歲前港姐女友單文柔結婚！煎Pang表示期待組織小家庭，並盼得到大家祝福。
兩度浪漫求婚 單文柔冧爆
之後單文柔接受傳媒訪問，大爆煎Pang求過兩次婚，第一次在香港趁佢睡覺時，用一隻自己摺的心形紙戒指戴在其手指上，待佢醒後才發現，雖然好冧但單文柔都say no。第二次在英國，煎Pang在人流甚多又有巴士的大街再跪低求婚，這次單文柔最期待的畫面終於出現，如此感動當然點頭say yes啦！
單文柔 獲港姐好友送上婚前驚喜派對
單文柔同屆的港姐亞軍劉穎鏇及落選的魏韵芝，早前為準新娘送上驚喜，原來兩人預先訂房替準新娘舉行婚前派對，房內放滿粉橙色嘅汽球，仲有「bride to be」嘅橫額，Phoebe一入到房就好驚喜咁話﹕「嘩，好靚呀！」
兩位好姊妹仲甜蜜向佢獻吻，派對現場又以粉紅色為主色，擺滿粉紅色氣球及花瓣，真係好Sweet！
魏韵芝就留言話：「Congrats my Soulmate，Hope you liked the surprise（恭喜晒我們的心靈伴侶，希望你鍾意呢個驚喜。）」 又話﹕「女人的浪漫，誰說玫瑰只可以男人送？」佢講笑話Phoebe係幸運女神，反問點解唔係自己！
單文柔舉行婚前派對，房中掛滿汽球和寫上Bride to be的橫額，而她們還為準新娘戴上小后冠和彩帶，兼送上小蛋糕﹑花和香吻，逗得單文柔驚喜又開心。
今年(10月13日)就係陳展鵬迎娶單文柔的大日子，新郎煎Pang一早於中環四季酒店接過新娘單文柔，之後去到船上舉行婚禮，新娘子肯定畢生難忘！
陳展鵬一身西式禮服一貫地有型，而單文柔則身穿露肩婚紗，盡現美好身段，性感又高貴！兩人在親朋戚友見證下註冊成婚，恭喜恭喜～
晚上陳展鵬與單文柔於四季酒店舉行婚宴，兩人換上另一套禮服見傳媒，單文柔表示中午宣讀誓詞的部分令佢非常感動，另外又指有唔少結婚儀式都刪減了，包括未有玩新郎環節之類。而煎Pang就表示父母都非常高興，令平時比較cool的爸爸都特別開心，好滿意新抱仔！