巴黎有浪漫之都嘅美譽，市內嘅歷史建築物，好似艾菲爾鐵塔、凱旋門、愛麗舍宮、羅浮宮、協和廣場、巴黎聖母院……相信大家都唔會陌生。而每年4月舉行嘅巴黎馬拉松就可以帶大家一日精華遊飽覽巴黎迷人景緻。
4年前，我參加咗人生第一次岀國馬拉松，展開咗海外馬拉松之旅。「巴馬」係全球十大馬拉松，至2019年已經有43年歷史，今年更有49,155人一齊參加呢項賽事。相比其他著名馬拉松賽事，巴黎馬拉松無需抽籤，以先到先得方式報名，有興趣嘅選手就要密切留意官網，唔好錯過機會。
想輕鬆適應當地環境，建議參賽者喺報名時選擇埋5km早餐跑，通常會在正賽前一日開跑，路線包括香榭麗舍大街、凱旋門，最後以艾菲爾鐵塔前的廣場吃巴黎早餐作結束。報名費為5歐元（約44港元），當中包括一件紀念T-shirt，享用巴黎特色的早餐牛角包及咖啡，仲有香蕉供恢復體力。
Expo運動展覽位於Porte de Versailles，參賽者記得帶同官方提供嘅醫生證明表格報到。Expo會場主要分兩區，一面係跑步相關商品嘅攤位，另一面係馬拉松賽事攤位。筆者覺得最值得購買嘅就係印有比賽Logo嘅紀念tee，其他運動用品同市區售價差不多。
Porte de Versailles
地址：Hall 1, Paris Expo Porte de Versailles, 75015 PARIS
4年前呢次巴黎馬拉松天氣好好，早上氣溫大概有9度。路線由香榭麗舍大街（Avenue desChamps-Elysees）岀發，途經凡仙森林（Bois de Vincennes），塞納河（Seine River），杜勒麗公園（lesTuileries），最後以通往凱旋門的福煦大街（Avenue Foch）作終點。而2019年賽道所調整，參賽者還會跑過凡登廣場（Place Vendome），巴黎歌劇院（Opera)，跑畢整條賽道，儼如走了一趟古蹟文化之旅。
官網圖片
歐洲賽道跟香港賽道比較一般較寛闊，而且當地天氣乾爽，跑起嚟相對舒服。起跑路線途經多個名勝古跡，路段多以不平坦小石塊堆砌，平坦馬路佔較少，跑手要有心理準備。
途經塞納河，見到聖母院建築，又穿過艾菲爾鐵塔，景緻迷人。唯一比較大挑戰係約28km後，有好多上斜落斜路段，隧道過完一個又一個，體力消耗較多。
官網圖片
巴黎馬拉松氣氛好好，沿途不乏啦啦隊打氣。跑步過程不時會聽到「Allez! Allez!」，即係法語加油嘅意思。雖然有好多進岀隧道位，但大會喺暗黑環境中安排激光幻燈，增添唔少視覺娛樂。
比賽後段雖然開始多啲平路，但由於氣溫上升同太陽猛烈，對跑手嚟講係最大挑戰。要捱到最後真係要唔少意志去堅持。
4月份巴黎嘅氣溫約7至15度，比賽前要注意保暖。大會保安嚴密，於衝線區兩旁設有鐵欄，家人及朋友不能夠在此等候，跑手需要多行幾百米才可以同親友分享衝線喜悅。
當年衝線後，除咗收到大會紀念Tee同獎牌，仲收到意外驚喜，就係求婚介指同玫瑰花。法國巴黎果然係浪漫之都，完滿咗我第一次參加嘅海外馬拉松。
巴黎馬拉松（Paris Marathon）
下次比賽日期：2020年4月5日 早上8時起跑
全程馬拉松：150歐元（約1,330港元）
5km早餐跑：5歐元（約44.3港元）
限時完成：6小時
報名官網：Paris Marathon sign up
巴黎基本資料
地理位置：位於法國北部
時區：比香港慢6小時
簽證：持有香港特區護照可免簽證
官方語言：法文
撰文及攝影：蘇兒（Zoe）
鍾情於打排球同跑步嘅女生，閒時環遊世界發掘美景。期望可以跑晒世界上有名嘅馬拉松。
