【乜代宗師評論】好睇是良知　黃子華再令支持者尷尬

原定今年的賀歲片將會掀起一場世紀大戰，合拍片及國產片早已駐重兵，熱血愛國的《奪冠》（前名︰中國女排），加上大型動作片《緊急救援》，兩個火車頭早就蓄勢待發，本土題材加黃子華牽頭的《乜代宗師》將單刀赴會，在香港打一場硬仗。結果，更加蓄勢待發的叫「武漢肺炎」，而且一發不可收拾，令全線內地賀歲片一律撤檔，戰場由中港大戰一下子又變成地區格鬥，黃子華鬥黃百鳴鬥葉念琛。

買飛睇會唔會嘥咗隻雞？《乜代宗師》由宣傳到上畫，話題一直都在，事關5年前子華在棟篤笑上主動以雨傘運動為題材，並從示威者立場演出，獲廣大市民支持和讚賞。情感上話俾自己知，往後只要是黃子華出品，定必鼎力支持。不過一講到電影，情理上又同自己講，買飛睇黃子華電影？唔會嘥咗隻雞，但會嘥咗啲錢同時間。
於是未上畫大家已熱烈討論會唔會好睇？有冇上次《棟篤特工》咁差？結果，學佢本人話齋，「從來」同「永遠」只會用在負面事情上，殘忍點都要說句，黃子華從來冇呃過大家，佢執導的電影永遠都唔好睇。今趟是他第二次自編自導自演，對比18年前的《一蚊雞保鑣》，手作仔風味，Cult Cult地倒令人會心微笑。反之今次，就連劇本都出現問題，不流暢不完整不好笑。

棟篤笑思維拍攝有看過近年黃子華棟篤笑，在開場前播放的微電影嗎？《乜代宗師》可說是這種微電影風格的加長版，角色人物描寫片面，劉心悠打假拳的理由，跟子華由仇人變戀人的原因，統統水過鴨背說了就是，情理不通勉強接受。笑位方面既牽強又老套，你眼見笑位已出現，就是笑不出。而且全片最大問題是節奏，喜劇最重要是捉緊節奏，但子華似乎用了棟篤笑方式拍攝電影，慢慢鋪排慢慢推進，到笑話一出其實早已洩氣。

故事似在深層分析「造假」如何假到呃埋自己，但就未見精僻獨到，沒有預期那種抽水怒罵，更欠缺棟篤笑金句的一針見血。原來就算同一個人創作，只要轉一轉呈現方式，都可以差之千里，站不住腳。結果成套戲的笑位都是令人尷尬，令黃子華尷尬，令支持者尷尬，令奮力叫人一起支持的都一起尷尬。既然好睇是良知，最後亦只好為該片留下三個字︰唔好睇！話晒第二次交功課，還需要磨練，以黃子華的底子，應該經得起多兩三次的「失準」，但最緊要唔好自己都呃埋，到認清自己並不屬於這個舞台時，就要知進退。
 撰文︰余建 Facebook專頁︰https://www.facebook.com/Stupid.View