今晚打機夜唔夜呀～
以前大人成日話打機無前途，到今時今日電競正式成為一種運動，真係唔可以睇小打機嘅文化。唔同地方打機嘅人都有佢地慣用嘅口頭禪，有D係國際通用，有D就好有本地特色。好多打機潮語慢慢演變成大家生活用語，就算你唔打機，都一定聽過，不過都可能有人成日講都唔知道到底呢個詞語點嚟，今日DailyView就用網路大數據同大家望下排行前十名嘅打機潮語同佢地嘅起源啦！
DV小教室：網路溫度計透過《KEYPO大數據關鍵引擎》大調查觀測咗近萬個網站頻道（而且不斷增加ing），包括港澳地區的新聞頻道、FB、IG同埋各大討論區、Blog……透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
image source：Facebook/LOL Esports
10 識玩一定鬥多Combo
同樣係英文詞嘅Combo，無論係音樂節奏game定格鬥game都會出現，指連續達成嘅操作，姐係連擊。例如大家都好熟悉嘅太鼓之達人/街頭霸王，都有顯示Combo，Combo越多除咗表示你手速同反應夠快之外，都會有一定加乘，又姐係分數/攻擊都會更高。用係現實生活，如果你口才了得，同人辯論一句接一句chur到人無聲出，都可以叫做高combo KO人。
image source:Youtube/PowerPyx
9 下下Headshot先叫勁？
Headshot 一睇就知意思就係我地都成日講嘅爆頭，來自於用槍瞄準敵人頭部進行攻擊，特別係打開喪屍game、槍game，識打一定直接headshot人。除咗因為射頭係直接KO人之外，同時又可以展示自己技術高。呢幾年示威事件示威者都被警棍爆頭嘅情境都唔只一次，睇下d警察都瞄得幾準。
image source:Youtube/Garena eSports
8 咁屈機，點玩呀
講咗咁多，今次呢個詞就真係100%本港出產。好多遊戲都會被發現有bugs，屈機原本意思指係遊戲入面因為一d bugs導致對手避唔到，硬食攻擊而死嘅情況。延伸出現實生活使用，就係實力差距好大，基本上無得輸，「點解連車尾燈都見唔到！」，呢種屈曬機嘅意思，可以作動詞又可以做形容詞，學完絕對好實用。
image source:香港網路大典/屈機
7 夠膽出嚟挑機！
挑機呢個詞最早係出現係八九十年代機舖，如果去過機舖打Street Fighter，應該都試過打打下遇到對面有人入錢同你連線挑機，不過對手就坐係你對面，如果EQ差d分分鐘變成真人版格鬥。最近撩人挑機最紅例子一定係7月頭示威嘅時候有一名警察向市民挑機，大叫：「隻抽呀！」呢單野紅到連台北、加拿大，英國街頭都可以見到關於呢一幕嘅海報，挑機挑出國際。
image source:Facebook/遮打豪庭 Chater Views
6 奶媽，幫手補個血
如果係無打開機嘅人，可能都唔知咩事，做咩打打下機都會提起奶媽？又真係幾難估嘅，其實奶媽就係指係遊戲入面可以幫隊友回血、復活嘅角色。有睇周星馳電影，都聽過入面講嘅奶媽，其實呢類角色同古代嘅奶媽某程度上意義都差唔多，加上好多呢d治癒型角色都係女性，所以就被統稱為奶媽。
下次打機聽到呢個字就知點解啦～
image source:Youtube/懷舊經典電影
5 一句秒殺你
源自於打機嘅時候實力懸殊，係短時間之內，被敵人一下KO／你快速殺死對方，未嚟得切還手就勝負已定嘅情況，有時或者會再將秒殺簡化為單字一個秒。變成用喺日常生活入面嘅潮語之後，可以表示有時候係一句說話就秒殺人，推翻人地論點。打機想秒殺人，一班歌手都想秒殺。演唱會賣飛日連個網頁都未load到，飛都已經俾人買曬，呢種秒殺人人都想要呀。
image source:Youtube/Pro Fluke
4 個個都想升呢
打機最緊要係咩？當然就係升呢啦。
打機嘅時候為咗方便，由原本英文「升level」簡稱為升呢，而係遊戲世界，level就係地位嘅象徵。人地問你打到幾呢，打到金牌、菁英喇，真係講句說話都大聲d。而喺現實生活中，要升呢就無咁易啦，好多時都要睇運。嗱，好似郭富城老婆咁，由一個出過兩本寫真嘅小小model，搖身一變天王嫂，呢d就真係一步升呢喇。
image source:Facebook/廣東話資料館 Cantonese Museum
3 課金課上癮
「沈迷賭博=倒錢落海」，呢句說話大家由細聽到大，其實沈迷打機一樣好危險。課金意思係用錢買遊戲入面虛擬貨幣，依家好多遊戲都將獲得裝備、角色要求定得好高、甚至一定靠課金先可以得到。一係慢慢打到天荒地老，心急無耐性又想早過人哋有？唯有嗱嗱聲拎卡出嚟俾錢啦。最近連蘋果新聞都開始行課金路線，網上新聞一向免費，不過其實一班記者朋友喺前線採訪都唔簡單㗎，捍衛新聞自由，3蚊係值得支持下嘅！
image source:巴哈姆特/【歡樂向】碧航自製表情包
2 個個都有分身術
網路世界可以話係好多人抒發自己嘅好地方，現實身分就得一個，不過係網上，好似火影咁要幾多都得。打得機多嘅兄弟都一定唔會得一個ac，好似依家鍵盤戰士都一樣好多分身。歌都有得唱啦：「如真如假，如可分身飾演自己」。前排蔣麗芸面書管理員扮第三者留言撐自己，示範自己嘅post自己回呢個玩法。果然要呃人先要呃自己！
image source:COCO01
1 呢舖ＧＧ鳥
打機當然大家都想贏，不過輸咗都要有風度d，講句GG和氣收場。原本意思係「Good Game」，表示對方真係玩得好，雖敗猶榮咁話。到後來講得越嚟越多，就變咗大家成日掛係口邊嘅GG，意思都引伸為「大鑊」、「呢舖玩完喇」。我哋成日講正評負評，其實香港討論區入面就係用推post同GG嚟表示，就算唔認同都俾個GG你，呢個用法同good game算唔算有少少相似呢？
image source:九蛙圖片十大實用打機潮語
電競產業發展得咁成功，打機都唔再係無前途啦，仲可能打到變網路紅人添。善用呢D潮語除咗係跟上潮流之外，其實都係捍衛本地文化嘅一種呀，廣東話潮語真係博大精深！
分析說明：
本研究資料由《KEYPO大數據關鍵引擎》提供，分析時間範圍為2018年07月16日至2019年07月17日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『打機潮語』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。