談戀愛到分手，有人同前度相見分外眼紅，有人再見亦是朋友。最近播出嘅《3日2夜》中，「再見亦是朋友」組就多咗一對羅天宇加湯洛雯，拍過拖嘅兩人喺旅遊節目中火花四濺，笑料百出，唔少觀眾都話好睇，仲誇張到希望佢地可以復合，睇嚟前度帶嚟嘅化學反應真係唔可以睇少！
感情事咁複雜，有時好難分出所謂對與錯，分開咗都可以繼續做朋友。當戀人升華成友人，感情仲會俾以往更牢固。就算分手嗰陣鬧得不愉快，時間淡化咗之後一樣可以忘記傷痛，繼續好朋友。好似羅天宇同湯洛雯呢對，仲一齊去挪威拍節目，兩個昔日最熟悉嘅情侶，變成唔陌生嘅拍檔，節目火花四濺，令觀眾睇得好過癮添。
最新一集嘅旅遊節目《3日2夜》中，羅天宇同湯洛雯一齊飛去挪威睇北極光，坐雪橇犬。由戀人降級成為好友，好多人都覺得佢哋係咪已經暗撻返著，但係之前接受訪問兩人都極力否認復合傳聞。
無論佢哋係想借昔日戀情炒熱個節目，定另有所圖，挪威篇真係好好笑呀，有哋公主病嘅靚湯，同百依百順嘅老實羅天宇，兩人嘅互動都特別真實同funny，比一個人去旅行要生動得多。
CP粉肯定總想喺兩人嘅對視之中揾一啲餘情未了嘅影子，可惜當事人嘅答案係「冇可能復合嘞」。
睇咗播出嘅挪威篇，好多人仲評論Roxanne同Joey真係好襯，對此靚湯都有霸氣回應「唔襯點喺一齊四年呀？！」
馬國明×胡定欣
馬國明同胡定欣曾經有過一段短暫嘅關係，分手之兩人感情不變，馬明同定欣仲有當時馬明嘅女友黃心穎一齊拍《宮心計2之深宮計》，馬明笑言前任同現任相處融洽，傾計傾得超投緣。
「安心事件」爆出之後，一班網民去到胡定欣IG留言，希望兩人可以翻撻，不過感情呢啲嘢，冷暖自知，邊係觀眾話點就可以點嘅呀。
吳浩康×鍾舒漫
當年因為吳浩康偷食而分手告終嘅呢段戀情，都曾經令鍾舒漫傷心絕望過。當時阿Deep都承認自己辜負咗呢個好女仔。不過時間可以撫平一切傷痛，大家都走出呢段痛苦嘅過去之後，終於可以握手言和。
早前兩人仲一齊去露營拍節目，原來時間真係可以沖淡一切嘢！
楊千嬅×鄭中基
鄭中基同楊千嬅多年前曾經有段戀愛，分手兩人依然係朋友，任何嘅流言蜚語都影響唔到佢哋嘅關係。千嬅仲試過去鄭中基演唱會做嘉賓。不過兩人如今已經各自組建家庭，各自有幸福嘅生活，過去都只係記憶中嘅一部分。
相信有機會睇到鄭中基同阿Sa同台，先更能令大家驚訝。
黃子佼×小S
黃子佼同小S，以及曾志偉女兒曾寶儀嘅一段三角戀曾經轟動一時，如今小S已經係三個女兒嘅媽媽，黃子佼都揾到自己嘅真命天女孟耿如，小S都已經放低悲傷同恨意，喺自己嘅節目上同黃子佼世紀和解。
黃子佼同未婚妻嘅婚期將近，回歸朋友身份小S都搞笑放話，話黃子佼敢俾喜帖佢就敢赴宴，仲會封大紅包。黃子佼就好大方咁話紅包可以唔需要喇，只要人到一齊食餐飯就ok。
**Follow us on:
- Facebook: CosmoHK
- Instagram: @cosmopolitan_hk
- YouTube: CosmopolitanHK**