今年5月宣佈約滿TVB離巢的楊秀惠，早前回家鄉馬來西亞秘密誕女後，由於疫情關係一直未能返港。頻頻於社交網Update近況的她，今日宣佈其YouTube Channel「楊秀惠VY創業分享頻道」正式上線，實行轉型「創業界KOL」，跟網民分享做美容、修身生意的心得！而最新一條影片主題為「楊秀惠：我是如何在網上商店賺取一億港元？#成功秘訣分享#離開TVB的原因」，她更不忘呼籲粉絲幫手Like、Share和Subscribe，落力為自家平台做宣傳！影片中，楊秀惠跟大家分享自己用過的銷售平台及支付系統，一開始她笑稱並非「標題黨」，自言其投資的網店由開業至今，約4、5年間已賺超過港幣一億元，而去年度，僅在其中一個銷售平台的收入已超過港幣2,232萬，當中更透露客源遍佈香港、新加坡及馬來西亞等地區，她續說：「呢一億港幣職係全球網上生意額，當然呢條數唔係我淨賺嘅，我仲要扣除買貨嘅錢、郵費、網上廣告、網站系統和日常維修的開支，我可以話俾大家知，由開業到而家淨係網上銷售平台，唔包括日常維修，已經用咗超過7位數港幣。其實一個流量大嘅購物平台，當中租伺服器、緊急維修等，呢啲使費係唔少得過一個1,000呎香港店舖嘅1個月租金……」
其後楊秀惠直言生意上軌道後，讓她足以達到財務自由，從而可以選擇自己喜歡做的事，她說：「就好似過去幾年，我都推咗好多主角角色，我選擇TVB預支俾我嘅薪水還番俾TVB，其實我選擇繼續喺TVB做就唔需要將呢筆錢退還番去，但我就揀自己鍾意做嘅嘢，好似而家咁成立一個Channel，同大家分享自己創業嘅經驗，希望可以幫到大家。」又謂財務自由亦給予她「Say No」的能力，去拒絕自己不喜歡的工作。最後，楊秀惠分享的貼士，是要保持「Ignore the Naysayers（別理會睇死你的人）」的心態，她直言在拍劇及做生意的路上，遇得最多的是「Naysayers」，「無論我拍劇有幾努力，點樣努力去改善自己，最後好多人都話你進步咗好多、演技好咗好多，但總會有啲人就係會話你唔得，雖然好多都係善意批評，而我本身都願意虛心接受去改善自己，但慢慢會發現一個道理，就係世上有100人，冇可能100個人多鍾意你。」看來楊秀惠不單止分享創業經驗，仲做埋「人生導師」，我今日真係學咗好多嘢呀！