吳千語同富三代築3千萬愛巢　擬出年拉埋天窗

林峯舊愛吳千語跟家族資產逾百億嘅「富三代」施伯雄翻撻，兩口子成日喺社交網低調放閃，感情愈來愈穩定。唔經唔覺千語BB已經26歲，據知施伯雄已準備好出年迎娶「BB」，仲喺舊年年尾一擲3,000萬喺清水灣傲瀧，購入1,800呎豪宅。有埋新婚愛巢，千語BB幸福爆燈，一啲都唔輸蝕畀林峯呀！

其實千語BB已融入施伯雄家中，又同佢嘅朋友圈稔熟，就算兩口子去公園拍拖，千語都係坐自己原名吳欣容登記嘅名車，弔詭係呢駕車登記地址就係施伯雄嘅南灣豪宅，有車又有樓，千語BB依家只欠一紙婚書。

施伯雄真係好錫BB，據知，愛巢裝修落重本，屋內大玩歐陸風，又有大浴缸方便鴛鴦戲水，佢知BB鍾意煮嘢食，就連3萬蚊一個焗爐眼都唔眨就買咗。不過依家因為疫情關係，二人婚期最快都要等到出年下半年，千語BB依家可以學定做人妻都得喇！

東網網站 : https://on.cc/

東網Facebook專頁 : https://www.facebook.com/onccnews/