《繩角》配角人氣不輸MIRROR　駱振偉爆肌練美娟水著福利

由MIRROR成員AK（江𤒹生）及Lokman（楊樂文）主演的ViuTV熱播劇《繩角》在上月中出街後反應不俗，除了主角騷肌及對戰場面夠吸睛之外，劇中飾演「林愷鈴三姑姐」的練美娟（娟姐）及「大師兄」駱振偉的演技同樣得到網民力讚！

現年32歲的娟姐加入ViuTV近五年，由主持節目《Girl's talk》和《磚‧家》等做起，曾經試過入行半年零收入，被逼搬到劏房居住，幸好本身夠慳家加上得到屋企人支持，最後都撐過去。直到去年有機會演出劇集《大叔的愛》中「Carmen姐」一角而成功入屋，之後更一劇接一劇，先後演出《反起跑線聯盟》、《季前賽》到《繩角》。

除了自然演技得到網民力讚外，娟姐更因為性格豪邁又貼地而深得網民喜愛。雖然多次被指「有肉地」，但娟姐從未有刻意減肥，過去更曾在IG表示：「或者『肥』呢個形容詞，係人哋認識你，對你印象嘅其中一個標籤，但係 只要你努力 繼續做好自己，你嘅CHARM、你嘅才能、你成個人，先係大家記得你，喜歡你嘅唯一亮點。」

至於駱振偉近日就因為一幕同Alton飾演的「亞洲拳王井澤魂」對戰，最後戰死播台而引起民怨，不少觀眾都表示唔捨得駱振偉，仲大讚《繩角》是他出道以來的代表作！

其實現年38歲的駱振偉入行十多年，2004年因為參加「Teen Power Freshmen選拔賽」奪冠而加入港台旗下年青人網上平台Teen Power，去到2006年轉行做過空少，一年之後又再參加英皇新秀歌唱大賽得到金咪大獎。在演藝圈輾轉多年，直到2016年加入ViuTV，先後擔住過多個節目如《撳錢》、《晚吹》、《Chill Club》等主持，又演出過劇集《詭探》、《熟女強人》等，可算是個全能藝人。

外表花弗的他現實中是「愛妻號」一名，當年他原本想利用交友平台Tinder攞料做生意，意外認識丹麥女飛機師Katrine Friis Olsen，到2019年二人更在丹麥舉行婚禮，駱振偉不時在社交平台放閃。