卡塔爾世界盃日記 Day4
𡁻低德國 日本好嘢！
加拿大真唔抵，打得咁好都輸波
廣告（請繼續閱讀本文）
廣告（請繼續閱讀本文）
是日想小hea一下，只留喺球迷村睇波，邊度都唔去。日頭將枱凳放出方艙門口，開部macbook睇足球小將點樣熱血殺敗德國，爆出今屆第二場冷門；夜晚攤喺疏化睇大銀幕，睇完西班牙血洗哥斯達黎加，再睇住加拿大12碼宴客，最終贏形勢輸俾表現差勁嘅比利時。如我所估計，今屆會有好多爆冷波，因為傳統強隊都唔係處於高峯期，德國唔係當年嘅德國，西班牙冇晒星味，荷蘭陣容未完整，比利時同克羅地亞明顯老化，葡萄牙差啲入唔到決賽周，英格蘭從來都係粗枝大葉⋯⋯
廣告（請繼續閱讀本文）
今晚最過癮係叫咗兩杯阿拉伯咖啡，個阿拉伯婦人拎住熱騰騰嘅咖啡嚟到我哋睇波位置，用Dallah咖啡壺徐徐將地道嘅Gahwa咖啡斟落隻杯仔度奉客，隻杯都有名堂㗎，叫做Fincan。細細杯，飲完又斟，總覺得似飲緊潮州功夫茶。唔止咁，佢仲點燃埋沉香木，香氣撲鼻而來，精神為之一振。波，原來可以咁樣聞住香睇。（影相嗰時已徵得佢同意）
港婦歎咖啡，側邊個𡃁仔牛咁眼望住，好搞笑！呢杯Gahwa咖啡飲落唔似咖啡，因為有好重香料味。查實Gahwa（阿拉伯咖啡）係點泡製嘅呢？烘焙之後，中東人會將咖啡豆放喺燈芯草墊上面冷卻，然後用杵磨成粉，放入壺裡面，再加入豆蔻、茴香、丁香、肉桂或藏紅花調味，唔經過濾咁飲用。味道都幾苦下，但又散發住濃香，通常會一邊飲一邊咬幾啖甜甜嘅中東椰棗。所以話咖啡唔止係咖啡，成個package嘅中東咖啡文化，包含咗好客、慷慨同一絲不苟，因此列入咗聯合國非物質文化遺產，每一啖都係沉澱千年嘅精華。
是日賽果：
摩洛哥 0:0 克羅地亞
德國 1:2 日本
西班牙 7:0 哥斯達黎加
比利時 1:0 加拿大
By港佬