香港爭唔贏NBA中國賽好正路！網民燒埋啟德體育園實屬無稽｜運動公關Gordon

當大家知道NBA 2025年10月10日及12日喺NBA澳門舉辦兩場季前賽時，大家都會好奇「點解唔係喺香港？點解唔係喺啟德體育園？」

與其去冷嘲熱諷，不如睇睇澳門本身同NBA關係有幾深？

1.金沙集團同NBA簽咗一份多年合作計劃，雖然未透露合作詳情及金額，但傳聞話係一份五年合約，每年2,000萬美金，條款包括未來五年兩場NBA中國賽都會係喺澳門舉行。所以唔好話香港，北京、上海及深圳未來五年都唔會有NBA中國賽。
2.依家達拉斯小馬（我唔鍾意叫獨行俠）嘅股東係邊個呢？

未睇文前你未必估到，睇緊篇文你已經可能估到。

無錯，就係金沙集團最大股東Sheldon Adelson及拉斯維加斯金沙集團總裁兼首席營運總裁Patrick Dumont。收購價大約係35億美金，可以夠舉辦175年NBA中國賽。講笑咁講，你個孫個孫個孫個仔，都未必睇到香港可以舉辦NBA中國賽。（當然，上面未計算通貨膨脹；而若果5年後金沙放棄主辦權，咁就唔使等175年）。

咁Close嘅關係及豐盛嘅財力下，大家真係覺得香港有得爭NBA中國賽返嚟？

3.唔少人無啦啦燒將依件事燒去啟德體育園。

但大家又知唔知，早喺2008年，金沙集團旗下嘅澳門威尼斯人舉辦咗兩場籃球國際賽，由Kobe Bryant、LeBron James、Carmelo Anthony、Dwight Howard等巨星帶領嘅美國隊，分別對戰立陶宛及土耳其。

筆者有幸現場睇過土耳其對美國果場，記得當年$1,300門票以半價發售，全場入座率大約五成左右。如果依件事發生喺香港，已經被傳媒插到一戙都冇。

籌備每一個賽事都一定要有耐性，無可能第一次舉辦就已經Full House，要有長久嘅耐性同燒錢能力。

啟德體育園剛開幕，要充分發揮其潛力，必須要有政商界持續投入更多資源，有沒有足夠的大型賽事及活動提高市民投入度，這需要時間去沉澱。

運動公關Gordon 邱益忠
亞洲運動及體適能專業學院（AASFP）運動公關／董事
青年創業軍《第三屆十大傑出創業青年選舉》顧問主席
香港健身Guide籌委組主席
《Startup公關教你初創成功學》作者
Instagram：gordon_khoo

註：專欄作家言論不代表本網立場

密切留意BossMind動向！立即CLS

FB Instagram Youtube