【睽違九年出大碟】泳兒：「條裙大到可以收埋十個小朋友！」

【泳兒睽違九年出大碟】泳兒睽違九年，今日推出全新廣東大碟《Dark Light Of The Soul》（《花開溝渠、葉落冰川》），Vincy表示大碟的出現，完全是一個「意外」，「三年前開始暗黑系列嘅曲風，一直都冇諗過出碟，只係想製作一個同我以往完全唔同風格嘅系列曲風，但一路行落去嘅時候，外間嘅反應都幾受落，公司亦都好支持，然後就提議不如出碟，所以今次完全係意料之外。」

相隔九年再次出碟，Vincy坦言緊張又興奮，「對上一隻大碟應該係2013年，再出梗係緊張，同時今次係我出碟以嚟最興奮嘅一次，因為三年嘅結晶，亦都係暫時嚟講係我最鍾意、最代表到我嘅大碟。」大碟共收錄十一首歌，以六個造型登場，當中以紅色ruffle裙最為搶眼，裙擺的範圍大到足以覆蓋整個拍攝棚，認真誇張，「其實條紅色大裙係郁唔到，我係要行入條裙入面，着咗之後係唔可以郁，因為真係好大，大到可以收埋十個小朋友！好似一個客廳咁大！」除了「客廳裙」，Vincy在拍攝「空中瑜珈」造型時亦十分深刻，發生不少趣事，「其中一個造型我好鍾意，就係喺個網入面，好似『空中瑜珈』咁吊起，然後擺好多唔同動作，不過大家太睇少我嘅重量，睇我外形以為我好輕，以為可以凌空吊我上去，其實我都有啲份量，哈哈。所以喺試坐時，條帶承受唔到我嘅重量，最後我哋係喺地下完成。」

除此之外，Vincy今年首隻推出的歌曲《葉落冰川》MV亦於今日上架，歌曲繼續由三年來合作無間的馮穎琪、CM及周耀輝操刀，是三年三部曲的最終章。Vincy表示《葉落冰川》是一開始海洋系列時候已經定好了歌名及方向，「佢係講緊一種信念、你相信嘅嘢，因為『葉落冰川』呢個異象正常嚟講係唔會發生，喺一個冰天雪地白濛濛乜嘢都冇嘅地方，如果你見到一片落葉嘅話，呢個異象喺隻歌裏面係代表住只要你相信嘅話，奇蹟係會出現。」《葉落冰川》同時亦是Vincy今日推出大碟的中文名《花開溝渠 葉落冰川》，「其實喺呢三年裏面，都做咗好多同泳兒以往曲風好唔一樣嘅歌，去到最終最終章，我哋會比之前嘅歌『抆』走咗少許嘅暗黑，我哋大家一致都好希望可以凝聚到一種力量，去勉勵所有曾經可能喺溝渠、遇過低谷嘅朋友，到最終只要大家繼續行落去，行吓行吓去到冰川嘅話，都仍然可以見到希望。」

《葉落冰川》MV：

#泳兒 #DarkLightOfTheSoul #花開溝渠葉落冰川 #葉落冰川

#香港音樂人 #香港製造 #makeinhongkong 

#香港人撐香港音樂 #撐廣東歌撐谷Live #香港音樂 

#2022廣東歌 #新歌 

----------------------------------------------

👍🏻 Facebook：https://bit.ly/2HZAgDL

♥️ IG：https://bit.ly/34PhuYx

⭕ YouTube：http://www.youtube.com/c/谷Live

🏆 谷撐音樂流行榜：https://bit.ly/3q6yB0l