馬德鐘受訪港台節目《舊日的足跡》，入行28年，馬德鐘之前當過警察及要員保護組（G4），最難忘是負責保護戴安娜皇妃和查理斯王子。他直言1993年入娛樂圈時的目標是當男主角：「可惜剛入行已經冇得做小鮮肉，喺劇集《創世記》已經做大佬（角色）。依家嘅《我家無難事》我依然係一嚿臘肉，只係肥膩咗少少。」馬德鐘初入行第一次北上少林寺拍攝古裝劇《武尊少林》，當年同劇演員陣容鼎盛，有溫兆倫、張兆輝、歐瑞偉、黎姿，還有體操王子李寧。他憶述：「當時輝哥（張兆輝）同瑞偉（歐瑞偉）已經係明星，但係冇架子，好照顧我。最近（我）見到李寧，佢仲記得呢套劇，不過就唔記得我呢個小角色啦！我好記得佢好勁呀，時時都有翻滾嘅動作！」
在眾多合作過的藝人前輩當中，馬德鐘表示劉松仁最令他印象深刻：「佢好犀利，對戲劇嘅處理好有一手，仲提點我哋要注重藝德，即藝人嘅品德，要尊重自己嘅行業，唔好踩自己嘅行業同公司，呢個係一門藝術，我聽咗之後好有使命感。另外，汪阿姐（汪明荃）係好演員，守時、做足功夫。同羅嘉良合作，我欣賞佢嘅內心戲。靚靚袁詠儀fit到不得了，我未見過佢NG，無論對白幾長都一氣呵成。宣萱呢個老拍檔更加難得，（為人）好爽朗，我哋兩個都係好積極嘅演員，每場（戲）都跑去化妝間換衫，唔會浪費任何時間，所以一定早開工！」
馬德鐘最為人熟悉，也是他最難忘的電視劇要算2003年的《衝上雲霄》。他形容當年參與拍攝時像夢似的，大製作、劇本好，也涉足很多地方；他亦不再只飾演壞人、基佬、舞男等角色。馬德鐘不忘讚揚劇中演員非常專業：「吳鎮宇好勁，佢唔喺為咗自己（喺戲入面）好睇，（睇事物）好宏觀、唔自私，係一個好前輩。嗰段期間，佢時時問我有關我初戀嘅感覺……原來，佢其實係為咗豐富自己嘅角色搵靈感，用心同投入嘅程度令我非常佩服！」劇中女主角之一陳慧珊，在馬德鐘眼中好紅但沒有架子，還會提點他；他慶幸自己常常遇到好人。對於兩人曾因拍劇而傳緋聞，他這樣說：「當時緋聞滿天飛，無辦法，嗰陣咁嘅年紀、咁嘅合作、咁嘅感情線、大家睇得投入，有啲咁樣情況出現唔出奇。我依家年紀大咗，咁咪少咗囉，依而家等啲年輕演員去講吓啦。」
談到家庭，馬德鐘太太是位哲學博士，也是學霸。兩人如何相處？「我哋結婚28年，相處得好好。佢係一個好堅持嘅人，做事一定要做到200分，好投入；我比較輕鬆，佢可以15個鐘頭做一件事，我唔得，我要飲吓咖啡，聽吓音樂，咁先至會有靈感……我哋點樣相處？一齊做運動、一齊去超市、一齊食素、生活情趣唔使刻意去做。其實我哋一直同步，佢行佢嘅路，我行我嘅，一齊向前行，兩人未必要做同一樣嘢。依家我已經超過50歲，所謂50知天命，我學識『物來則應、事過不留』，過去咗不用留戀，新嘅事物順應去做已經足夠！」