去日本，搭火車同浸溫泉都係熱門嘅旅行必備行程，依家兩樣嘢仲可以crossover，等你可以邊搭火車，邊浸腳！
為咗迎接三重県菰野町「湯の山温泉」開湯1300年，名古屋有全新嘅「足湯列車」，乘客可以喺列車上邊一路浸腳，一路欣賞車窗外面嘅風景。
足湯列車所使用嘅泉水係來自日本三重縣嘅菰野温泉，所有泉水都係當日抽取，而且有減緩神經痛、肌肉痠痛、關節痛、撞傷同舒緩疲勞等功用。
呢架足湯列車來往近鐵名古屋站至湯之山溫泉站，足湯區位於列車2號車廂，有兩個可以供4人使用嘅足湯，足湯用木材製成，成個空間感覺溫馨，都非常適合同屋企人或者朋友一齊浸住腳傾計。
咁chill嘅足湯列車車費並唔貴，成人只收500円，如果要用足湯，可以喺車內嘅櫃檯以100円加購「足湯使用券」（當日販售），夾埋都只係約$42，好抵！而且凡購買足湯使用券，仲送「開湯1300年記念毛巾」一條添啊！
除咗足湯，列車上仲有吧台，有售賣小食、特產俾乘客，小編就推介買價值1000円嘅菰野町嚴選三種在地酒組合，分別為「早春」、「菰野富士」同「菰野乃大物」，浸住腳飲返杯，再欣賞埋窗外風光，一個字，正！
乘客仲可以獲贈湯之山溫泉優惠券，包括：美術館門票折價100円優惠、御在所空中纜車半價優惠、溫泉街溫泉折價300円等，等你玩得開心！
呢架足湯列車會喺每個星期六、日同國定假日行駛，一直去到2019年2月24日（星期日）。冬天嚟喇～係時候嚟個溫泉旅行，鍾意鐵道旅行同浸溫泉嘅朋友，呢架足湯列車係個好選擇啊！
地址：愛知県 名古屋市中村区名駅1丁目2−2
營業期間：即日〜2019年2月24號（星期日）之間的六、日、國定假日（12月29日～30日、2019年1月1、5日、6日、26日、27日停駛）
營業時間：10:00～19:00
車費：500円（足湯需外加100円）
詳情見官網。
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
