開心，係要一齊分享㗎！
用開社交媒體，最憎就係俾人「洗板」，聚會相、美食相、旅行相……真係睇到人都燥晒！但有一種「洗板」係好多人好鍾意㗎，就係BB相喇，仲要係一眾自己心愛嘅明星藝人嘅B仔B女嘅可愛相！香港娛樂圈有唔少鍾意「晒B」嘅爸爸們，受到一眾網民Follow、留言，非常熱門。今次就等DailyView帶大家睇吓今年最熱門嘅十大晒B奶爸，睇吓佢哋嘅B仔B女幾可愛啦！
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
10 王祖藍（946筆）
之前王祖藍同李亞男結婚嗰時，唔少人都話王祖藍好福氣，搵到個高、靚、叻嘅老婆，依家睇佢哋歲幾大嘅囡囡王天韻（Gabrielle）生得極似媽媽，好多網民都話王祖藍無揀錯，B女似足媽媽，第時一定係個靚女！睇王祖藍成日都喺社交媒體到大晒一家甜蜜合照，真係睇見都覺得幸福，兩公婆要好好賺錢養可愛嘅天韻啊！
網民：「好彩祖藍基因輸咗！」
image source:IG／wong_cho_lam
image source:IG／wong_cho_lam
image source:IG／wong_cho_lam
9 林盛斌（1068筆）
行內外都知，林盛斌（Bob）為咗搵錢養家好勤力咁接Job，唔論工作大定細，拍電影定係主持，總會不時見到佢嘅身影。點解佢咁落力做嘢啊？梗係為咗頭家啦，想老婆同四個心肝寶貝開開心心咁生活囉！見啊Bob成日出Post晒全家福，就知幾辛苦都抵啦，就算老婆帶班仔女去法國Happy，自己喺屋企食撈麵又有咩所謂！
網民：「喺香港地要養4個小朋友都咪話唔堅揪！」
image source:IG／bob_lamshingbun
image source:IG／bob_lamshingbun
image source:IG／bob_lamshingbun
8 陳豪（1288筆）
陳豪近年嘅形象極好，完美表現出一個好老公、好爸爸應該係點樣。喺自己IG就盡力大晒同老婆陳茵媺嘅恩愛相，喺老婆IG就係一家五口出去玩嘅大合照，愛老婆又顧家，真係不得了。睇見陳豪大仔Aiden、二仔Nathan同埋細女Camilla三個都好靚仔靚女，Camilla擺Post個樣真係成個Model格走晒出嚟，真係抵陳豪開心。
網民：「佢哋一家真係幸福到暈。」
image source:IG／aimeechan_official
image source:IG／aimeechan_official
image source:IG／aimeechan_official
7 陳柏宇（1537筆）
講起晒B，真係唔可以唔提Jason陳柏宇，事關佢真係晒B晒到全城都知，成個IG三日唔埋兩日就出個Post影Abi。出得咁密會唔會令到網民好煩？梗係唔會啦，Abi幾咁精靈可愛，好多人都好甘心俾Abi洗版啊！不過早排Jason幫Abi沖涼嗰時拍咗條片Up上IG，俾網民話佢做咩唔幫Abi打個格仔，班Fans真係仲緊張過爸爸啊！
網民：「Abi個笑真係lum到暈！」
image source:IG／ckw720
image source:IG／ckw720
image source:IG／ckw720
6 古巨基（1826筆）
古巨基喺近日公開宣布自己榮登爸爸的消息，幾日間就被網民廣泛討論，皆因基仔同老婆雖然個樣童顏，但事實年紀都唔係細，好多人都好抵佢哋開心！其實BB早喺農曆新年前就出咗世，但因為香港疫情問題，基仔選擇唔公布住，不過依家先講都叫為香港帶嚟一個開心嘅消息。希望小朋友可以開開心心咁喺香港成長啦！
網民：「真係好想快D睇下BB個樣！」
image source:IG／leoku
image source:IG／leoku
image source:IG／leoku
5 陳展鵬（1867筆）
陳展鵬同太太單文柔嘅心愛女女「小豬比」（Quinta）真係好可愛，好多網友睇到陳展鵬Upload女女熟睡嘅相，塊面仔漲卜卜咁，盡顯BB仔天然嘅可愛魅力。見到陳展鵬D相入面，成日都B不離手，又不時偷影個女瞓覺個樣，睇嚟真係錫女錫到燶啊！唔少網民留言話，依家未識講嘢就咁Cute，遲吓學講嘢一定甜死陳展鵬。
網民：「不如再偷影多幾張小豬比瞓覺相啦！」
image source:IG／ rucochan
image source:IG／ rucochan
image source:IG／ rucochan
4 郭富城（2008筆）
郭富城係香港「四大天王」其中一位，靚仔又跳得嘅「舞王」印象深入民心，係當年唔少少女嘅夢中情人。一向型開嘅郭天王，近年做咗爸爸之後，即刻散發出一陣陣甜蜜嘅「奶爸」味。見城城會落示威場地幫個女買嘢，又會公開跳兒歌教學，為個女變咁多，真係唔怪得個女睇佢影唱會嗰時跟住跳，仲大嗌：「辛苦了！」
網民：「真係好想見吓城城兩個女嘅正面啊！」
image source:IG／aaronkwokxx
image source:翻攝自IG／mokafy
image source:IG／aaronkwokxx
3 鄭嘉穎（2175筆）
鄭嘉穎同陳凱琳嘅仔仔鄭承悅（Rafael）有晒爸爸同媽媽的好基因，眼仔大大，又可愛又靚仔，成日都俾一眾網民留言大讚愈大愈靚仔。睇鄭嘉穎IG嘅Post，成日都抱住個仔影相，唔怪得B仔最先叫嘅係「爸爸」啦，唔係叫「媽媽」，聽講搞到陳凱琳唔多開心咁喎。睇到佢哋一家咁開心，真係葡萄到不得了啊。
網民：「Rafael隻眼仲大過爸爸！愈大愈靚仔！」
image source:IG／kevincheng_official
image source:IG／kevincheng_official
image source:IG／kevincheng_official
2 周柏豪（3329筆）
周柏豪哥哥今年變成爸爸級人馬，話BB出世令佢感受過以往被曾嘗試過快樂同幸福，仲話自己會繼續努力工作，承擔起為人父親嘅重大責任。唔少網民都睇見柏豪嘅努力，當日個個網民爭住笑佢「比比鳥」，到依家個個爭住幫佢個女要改名。周芯悦小朋友，你爸爸好畀心機做嘢養你啊，你都要快快樂樂咁長大啊！
網民：「芯悦小朋友，你快些長大，就會看到你爸爸這麼帥。」
image source:IG／punkhippie
image source:IG／punkhippie
image source:IG／punkhippie
1 黃澤鋒（3566筆）
講「晒B」，黃澤鋒拎第一真係當之無愧，佢基本上日日出Post都係關於佢嘅「前世小情人」──「小黃妃」黃熙恩。睇佢地一家3口張張相都笑到咁開心，其實「小黃妃」出世過程好驚險，因為黃澤鋒太太年紀唔細，當日分娩後要喺深切治療部接受搶救，「小黃妃」情況亦唔係幾好，不過好彩最後都冇事！
網民：「最想見到你哋一家三口開開心心。」
image source:IG／briancfwong
image source:IG／briancfwong
image source:IG／briancfwong
【香港網路溫度計調查結果之圖文，未經授權請勿轉載、改寫】
分析說明：
本研究資料由《KEYPO大數據關鍵引擎》提供，分析時間範圍為2019年03月19日至2020年03月17日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『香港奶爸』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。