陳柏宇唔知吳浩康拍拖：我哋唔係咁好朋友

歌手陳柏宇出席活動，並化身「包禮物大使」為小朋友包禮物，笑言唔太識包禮物嘅佢，包巨型熊仔時顯得雞手鴨腳，幸好最終任務成功。

講到好友吳浩康與崔碧珈分手一事，陳柏宇指連對方拍拖都唔知：「我真係唔知，咁睇嚟我哋都唔係咁好朋友。（佢冇帶過對方見你哋？）冇，我本身其實又好少同行內人聚會，證明佢收得好埋。」

為女兒儲錢作供書教學

聖誕節將至，陳柏宇話一早同太太符曉薇交換聖誕禮物：「我送咗個行李箱畀佢，佢就送咗個卡片套畀我。（咁囡囡呢？）可能將啲錢入落佢戶口，等佢第時大個讀書可以用。」佢又話聖誕節暫時未有安排：「如果要開工就要開工，冇就同朋友喺屋企開派對。」

「獨守空房」9天

而佢亦自爆近日要「獨守空房」，因為太太帶埋個女去旅行9日：「我終於可以自己一個人瞓張床，因為平時我個女瞓中間，我終於發現張床中間係冇凹入去。（掛住個女？）都有，日日同佢哋video call。」

東網網站 : https://on.cc/

東網Facebook專頁 : https://www.facebook.com/onccnews/