【242人被控暴動罪】心存有愛的人卻要受到最嚴厲嘅懲罰

對於昨晚有 242 人被控暴動罪，我係特別接受唔到！佢哋係乜嘢人？就係一班因為理大學生／示威者被魔警圍困、想走都走唔到、仲有可能被防暴隨時殺入校園引發（a）大屠殺／港版六四；及／或（b）學生／示威者以 you burn with us 嘅策略同你一鑊熟而導致大量人命傷亡，繼而走出嚟希望「救人」的市民，且大部份係和理非。佢哋嘅出發點不外乎（a）睇唔過眼極權政府咁樣迫班學生／示威者迫到走投無路；（b）希望殺入校園救出學生／示威者，阻止悲劇發生；（c）分散防暴嘅力量，拖慢佢地殺入校園嘅行動，並 buy time 俾學生／示威者撤離；（d）覺得今次再唔出嚟，將有份接導致學生／示威者傷亡、運動重創，一世內疚；（e）對同伴／手足／鄰人嘅守望相助之情等；基本上，喺一班對 fellow human being 對生命有愛、心懷正義感、想幫人而且非常勇敢嘅「義人」；乜呢啲唔係一直以來社會高舉嘅價嚟咩？但係今天心存有愛，正義感、勇氣、樂於助人同願意作出犧牲嘅情操，係要受到最嚴厲嘅懲罰！

無錯，佢哋部份有掟磚、堵路同掟汽油彈，以有啲人眼中好「暴力」嘅手法抗爭，但又係嗰句，「是你（政權）教我和平表達訴求是沒有用的」！敢問一眾覺得佢哋好暴力、不斷譴責佢哋暴力、話我哋美化同浪漫化暴力嘅人，有乜良方妙計可以令個政府肯聽市民嘅訴求、令個社會公平一啲、令 721 嘅白衫人可以受到應有制裁、令有份殺人／強姦被捕女生／「被自殺」年輕人／開車撞人／連醫護都打都拉／使用過份武力令到被捕人士頭破血流週身骨折嘅「執法者」受到處罰？？

想和平集會／遊行你有又唔發「不反」，連司法覆核你都話香港法院係冇權時，仲有乜嘢「和平」嘅途徑可行？？

等於你封晒所有行車線，啲車塞住晒唔郁得，然後你抄佢哋牌話佢違例泊車，咁點會唔爆？！

發放出嚟嘅訊息又係乜？就係喺香港做人就要路見不平當無事發生，見人有難唔好幫人，見死要不救，最好乜龜縮唔好咁勇敢，自己顧自己做個自私精好喇，對所有嘢冷漠淨係掛住搵食就最好，係咪咁？即係要香港變成一個百份百嘅大陸城市啦係咪？

經幾代人嘅努力下，終於孕育到一班擁有高尚品格同情操嘅香港人，依家要一舖打殘，要整體社會退化到五、六十年前嘅水平；相比起掟磚、堵路、掟汽油彈、犯法對社會嘅破壞、邊樣大鑊啲？

今次運動已經非關反修例，甚至唔只係對「五大訴求」嘅抗爭，而係文明與野蠻之戰！

再睇睇呢 242 人裡面，當中大部份係十零廿歲嘅學生。若果佢哋入晒暴動，隨時要坐七、八碌；你真係要摧毀晒呢一代年輕人？你真係咁憎恨佢同仇視佢哋？你寧願一班郁啲就屌人老母、鍾意打人、姦人、殺人嘅魔鬼「執法者」也文也武、逍遙法外、甚至成為香港未來嘅中流砥柱？如果真係咁，呢個香港會變成個何等 evil 嘅地方？點適合人住？

一地死雀、一街棄屍、最後全民行屍走肉……咁嘅香港我真係接受唔撚到！！

（本文無題，題為編輯所擬）

守護言論與新聞自由。立場新聞，寸步不退。
每月贊助支持立場新聞